投資者日記 曹仁超 2008-5-09
現代人趕住發達
5月8日，周四。恒生指數收25449.79，跌160.42；成交七百六十九億五千萬元。5月期指低水，跌177點，收報25308點，代表短期後市向淡。
第二次世界大戰結束後，全球以美蘇獨大。到1970年代美元崩潰期出現三頭馬車（美、日、德），到今天金磚四國。世界財富由集中美國，到擴散至日本、西歐，再進一步擴散到中國、印度、東歐及俄羅斯、南美洲，相信最後連非洲亦加入。一如太極所示，太極生兩儀，兩儀生四象、四象生八卦，然後十六、三十二、六十四……一直擴散開去。1970年代、1980年代日本同西德相對美國係此消彼長；1990年代至今金磚四國與美國同樣出現此消彼長。雖然係咁，美國仲係全球最大GDP體系，佔全球GDP 22%至25％左右，只係唔再係戰後佔全球GDP 60％咁多而已（美國人口只佔全人類三十分一，卻佔全球GDP 22%至25％，十分驚人）。美國企業科技上仍擁有別國所冇專業，並將專業技術不斷向全球出口而賺取外；今天美國企業31.5％純利來自海外（1980年前不足15％）。1982至2000年美國經濟繁榮就係建基於專業技術出口，只係踏入2000年呢方面增長率漸漸放緩，結果聯儲局被迫減息刺激房地產上升去抵銷，依家正面對呢個泡沫破裂。
45歲前發達務求享受人生 點樣用四十年時間賺取1000萬元？大部分人已經冇乜興趣，最低要求係用二十年時間去賺取1億元或以上！此乃牛眼投資法漸漸流行理由。因此投資必須命中目標，而唔係同企業共同成長！
牛眼投資法流行有因
好多人只羨慕畢非德財富，卻唔認同佢對財富價值觀。一、作為企業家，可銷售產品或服務去積累個人財富；作為投資者，市場作出明智選擇，隨投資項目升值而帶來個人財富。換言之，創造個人財富過程中對整個社會作出貢獻或推動作用。例如透過個人想像力，勇於承擔風險支持自己睇好或睇淡項目，做社會上先行者。
做社會先行者往往十分痛苦。例如1997年7月1日因白眉董八萬五房屋政策，我老曹睇淡本港樓市，初期反應係被認為敵視特區，慢慢反對八萬五卻變成主流意見。反而2003年9月我老曹睇到特區政府推出「孫九招」而睇好香港地產後，又再次成為小眾。其他例如2001年因美國減息而睇好黃金及能源項目，我老曹又一次成為先行者，到2008年金價升穿1000美元，我老曹認為已夠晒數……。不過，中國傳統社會卻係槍打出頭鳥、誓死不為天下先。點解有呢種「智慧」？理由係中國社會一向冇法治精神，小眾不受法律保護。今天香港支持西藏人士被群眾喝打，點解香港女大學生仍有膽企出？因為香港有法治，法律保護小眾、異己，讓人可獨排眾議或做先行者而無所懼。此所以資本主義只能夠西方成長而非東方。
內地官員俱成慈善家
中國人認為不患寡而患不均，為富往往不仁，認為富豪財富獲得係巧取豪奪，而非服務社會，或以個人想像力、創造力、勇於承擔風險作為代價結果。中國人認為無商不奸，鬥批資本家並非共產黨先至有，中國歷史唔少富豪皆不得好死。古代社會分士、農、工、商、兵，將保家國兵列為最低，商人只係好DD，做官士則高高在上。儒家思想更大力批評追求利潤為劣行，有錢人捐錢叫沽名釣譽、有錢人有D文化叫附庸風雅，總之有錢就係有罪。1970年代我老曹同行止兄新春恭喜讀者發財，亦被人批評失去知識分子人格，咁社會又點會尊重資本主義？
今天反對勞動合同法者被視為「血汗工廠」，唔准電廠加價叫「體察民情」，汽油市場倒掛係政府「功德」，真係命！官員都成為慈善家矣，但佢地係慷資本家之慨，而獲「兼善天下」監管。咁樣社會，資本主義又點會有前景？
至於資本主義發展第三層次——回饋社會，表表者有畢非德同蓋茨。佢地唔係買政府怕，亦非搵政治利益，而係認同自己所擁有財富與其他人共享精神，對中國人而言更加匪夷所思！中國人富起來往往仲未夠，更希望子孫萬代亦富有，做善事係為後代積福，而非認為個人財富應與別人共享。所以，當中國人富起來便睇唔起別人，中國人富起來要到世界各地買豪宅、買名牌，今年流行新玩意叫做保護聖火！我地仍未擺脫憎人富貴厭人貧日子。
乜土地養出乜果實。咁樣土地，點樣迎接大國崛起？唔好自欺欺人喇。
大摩估計歐洲物業價格全面進入退潮，部分國家樓價下調幅度可能高達25％，令歐洲地產股失去吸引力。英國商業樓租金估計今年跌2.5％、明年跌6.1％、2010年跌1.7％；商業樓價今年跌11.8％、明年跌5.7％、2010年跌0.2％。即係話最快要到2010年各位才可重返英國物業市場。
做善事係對付抑鬱症良方
被認為「股市最後一個大佬」——湖南湧金投資董事長魏東，北京南長河畔家中墮樓身亡，消息由旗下上市公司九芝堂、國金證券及千金藥業發布。湧金系係私募基金神話，其掌門人1967年湖南出生，中央財經大學畢業，進入中國經濟開發信託投資公司做事。其後成立湧金公司，利用轉配股、法人股收購等政策上盲點套利，積累資本。2000年借VC（創業基金）理念投資孵化科技創業企業如青島軟控、北青傳媒（1000）港上市等公司，2002年再以私募股股權投資手法收購千金藥業，再以九芝堂作為控股平台。估計依家湧金系所持上市公司股權總市值達28億元。最近幾個月魏東受抑鬱症嚴重困擾，曾多次表示退出，最終跳樓身亡。旗下公司停板一天後恢復買賣，走勢平穩，公司經營及管理活動一切正常，證明同財政問題無關。現年四十一歲魏東正當壯年，卻落得咁收場，十分可惜。所謂抑鬱症金融市場十分普遍，因為金錢來得易、去得易，好易出現心理唔平衡。唔少人一年內賺1億元，第二年又失去5000萬元，對一般人而言仍有5000萬元應該算好好，只係患得患失心理壓力好大，如不及時開解，好易走上自殺之路。研究證明，快樂有50％係天生、40％係你自己點睇決定，只有10％同環境有關。你可以擁有100萬元而好快樂，亦可以一如魏東擁有10億、8億元走去自殺（可能因過去半年失去其中50％）。
換言之，專業技術出口帶繁榮已2000年結束，美國透過CLO（Collateralized Loan Obligations），利用群眾盲目去推高資產價格，製造出2003至07年繁榮，未來會否加倍奉還？例如衍生工具、期權、期指、貨幣合約等將投資工具變成兩大極端──成功者上天堂，失敗者落地獄。過去投資股票，股價跌三分一甚至50％，亦只失去本金30%至50％；衍生產品卻係贏盡或輸光！絕對係Double or Nothing遊戲。不過亦好難說錯與對。阿爺代想發達必須三代（第一代克勤克儉累積原始資本，第二代做生意將資本擴大，到第三代才大富大貴）。我地呢代一代人已可發達，例如1967年恒生指數67點到2007年32000點，四十年內恒指升四百七十七倍；1967年用1萬元到2007年變成1000萬元並唔困難，變成1億元有一定難度，但變成10億元亦大有人在。現今社會認為，用一生人去發達已無法享受發達成果，現代人要求係四十五歲前發達，即只用二十年時間去賺取1000萬元（最低要求）、1億元甚至10億元，然後四十五歲後去嘆世界，此乃點解D高風險高回報率項目咁受歡迎之底因。
我老曹感覺係，對付抑鬱症最有效辦法係做善事，少少捐助已可以令別人快樂，自己抑鬱症自然不藥而癒。呢幾個月如有人勸魏東暫時離開工作崗位，捐助1000萬元去幫助別人，相信佢抑鬱症已經醫好，唔會走上自殺之途。2003年母親逝世後，我老曹亦極之失落，係咪患上抑鬱症便木宰羊，但當時失去賺錢興趣，覺得一切事物都冇意義。其後我老曹開始做善事，五年過去，今天我老曹較2003年快樂許多。人係好奇怪動物，唔係物質生活便可滿足，反而物質愈豐富、精神上感覺愈空虛，有人尋求宗教上慰藉，我老曹則發現做善事幫助大好多。原來令別人快樂結果亦可以令自己快樂！唔信你地可以試。
編按 由於曹先生外遊，「投資者日記」將暫停數天。