Google

2008年5月19日星期一

曹仁超.2008-5-19

投資者日記 曹仁超 2008-5-19

死人樓仍要供樓
  
5月18日,周日。5月已過一半,至今為止,恒生指數仍以5月5日26387點為最高。

內地房屋罕買地震險
  
呢次股市反彈,以石油股、鋼鐵股、航運股為主,而唔係金融股。四川地震以後,建材股、金礦股、鋁業股均急升。內地銀行表示,震毀房屋之供款必須照常償還,除非事前有買地震保險;如借款人死亡,其遺產繼承人亦須還款。如借款人冇遺產或雖然生還但已無力還款,上述貸款可能變成銀行呆壞賬。平安保險(2318)發言人話,基本房貸款只買火災、爆炸、暴雨、颱風,好少買地震險;反之,外資銀行例如東亞(023)、恒生(011)等內地房貸投保一般都要求買地震保險。如垮塌重建補償,銀行獲優先受償權。中國人行副行長蘇宇表示,央行正研究地震震毀房屋按揭貸款問題,相信可搵出兩全其美方法,保護廣大民眾利益。至於信用卡還款問題,央行亦將商討特殊辦法處理。今天內地銀行股絕對唔貴,但未到便宜水平。
  
雷曼中國高級經濟學家孫明春分析,今年中國GDP增長率將降至9.8%、明年8%。中國開始面對產能過剩問題,單靠國內需求無法消化呢D產能,長期以來都靠強勁出口來解決。今年全球經濟低迷,加上中國出口退稅減少或取消,令中國企業存貨上升,盈利增速下降甚至出現虧損。
  
內需方面,A股指數去年10月起回落,加上食物價格上升,今年雪災及四川地震打擊,令消費增長率下降。央行正逐步抽緊銀根,令負利率狀況下刺激房產市場因素開始消失,擔心奧運之後中國GDP增長率全面減速。
  
上周五中國已宣布接受美國軍機運送食物、毛氈及發電機外,亦接受救援人員加入。由關島及夏威夷開出軍機今天(周日)到達成都,二百位國際救援人員立即加入工作。至今為止,地震死亡人數二萬八千八百八十一名、受傷人數十七萬名,超過四百七十萬間房屋嚴重受損,分布四川以至山西各省。四川省已為四百八十萬災民提供二千八百八十五處避難所;呢幾天國際支援隊伍紛紛加入搶救,但災情發生至今已超過一百小時,被埋者救得番機會愈愈渺茫;加上災民人數估計達到一千萬,災後重建費用將十分驚人,肯定拖慢中國經濟今年下半年進度。

聯儲局捨棄傳統做法
  
殊仔希望沙地國王阿卜杜拉增加產油去阻止油價進一步上升!情況似乎不容樂觀。CNN及Opinion Research Corp.調查所得,94%美國人相信汽油價將企於4美元一加侖之上;78%相信下半年升上5美元一加侖,目前3.62美元一加侖日子不會太長久(去年5月2.97美元一加侖,1981年1.35美元一加侖)。
  
上周四聯儲局委員Frederic Mishkin認為,聯儲局應在資產泡沫形成中將其刺破。上述做法同聯儲局過去傳統職責唔同,過去聯儲局係唔會關心資產價格升降,只負責維持物價穩定。例如香港樓價升降亦唔影響本港CPI,只有租金升降才影響CPI;股票升降唔影響本港CPI,電費、水費及巴士費升降才影響CPI。以過去做法,即資產價格升降對CPI並冇影響。
  
格蛇時代,聯儲局責任則類似清道夫,除夕夜完成倒數後搞到滿地垃圾,清道夫凌晨時分便須將之急急清理,以免元旦假日通街垃圾。典型例子係2000年3月科網股泡沫爆破,2001年1月起聯儲局負責清理。呢次2007年8月及08年3月聯儲局迅速介入去阻止金融系統熔毀(meltdown),即在未爆破前已迅速介入,令商品價格上升亦在所不惜。結果會對未來有乜影響?
  
索羅斯認為,聯儲局將利率由5.25厘急降至2厘,應可阻止金融系統崩潰,但卻不能阻止真實經濟沉降。美國已進入財富消滅期,最終令美國人生活水平下降。佢認為,樓市上升泡沫長達二十五年,而次按危機才剛開始,唔易在短期內搞掂。
  
美元價回落期相信已經結束,但基於利率差,在可見將來美元冇條件大升。美元兌英鎊、加元、日圓甚至歐羅已見底,但利率差可阻止美元價回升,睇只會進入拉鋸戰。美元在過去五年失去四分一市值(去年8月至今回落15%)。哈佛大學教授Jeffrey Frankel與Mennzie Chin去年研究報告認為,到2022年歐羅將取代美元成為國際貨幣,一如第二次世界大戰後美元取代英鎊成為國際貨幣一樣;並估計美元價一直回落,到2015年才穩定下來,理由係美國樓市泡沫爆破及次按危機,令聯儲局須維持美元利率在低水平及加快供應貨幣。雖然美國外貿赤字在減少中,但紐約Mellon銀行外分析員Michael Woolfolk認為,聯儲局已開始將美元價穩定下來,以免動搖國際信心引發拋售美元潮,未來只會逼人民幣升值,兌其他貨幣美元價變化唔大,上月美指數已回升2.5%。

千祈唔好加入炒米行列
  
美股3月17日起回升,係咪代表美國經濟進入復甦期?美國4月份零售數字上升1.8%,但有人指出4月份汽油價升16.3%、食物價升6.1%,如以量計,零售量係下跌2%而非上升。美元價今年下降超過6%,令入口成本上升,零售情況並唔樂觀。CPI方面,如我地採用1983年前方式計算,目前CPI升幅係11.6%;利用目前方式計只有4%。今天汽油、食物、教育、醫療等日常開支只佔CPI 50%;反之,平常好少支出項目如傢俬、電器、汽車等卻佔20%,房租及供樓資金佔30%(而非房價),令CPI對日常開支項目敏感度大降。新方式計算CPI升幅仍高達4%,而利率只有2厘,仍係負利率時代,但美國經濟在負利率環境下情況尚且如此!
  
由哥倫比亞大學製作ECRI Future Inflation Gauge & Implied Inflation,上述指數預測未來通脹極之有效,在2006年初已見頂(上一次係2000年第二季),即未來通脹率唔再令人擔心,估計明年前美國通脹率將回落。問題係美國經濟未來會進入溫和衰退還是溫和復甦?如明年美國出現溫和衰退,唔排除美國再減息1厘;反之,如明年進入溫和復甦期,聯儲局會加息1厘,令利率重返合理水平。
  
根據Ned Davis數據,1950年至今在每年5月1日投資、10月31日沽出,10000元投資至今只值10026元!五十七年內只賺了26元,其中二十一年下跌、三十六年上升。反之,在每年4月30日沽出、11月1日買入,情況又如何?至2008年4月30日止1950年10000元投資至今變成372890元!五十八年中四十五年上升、十三年回落。睇Sell in May and walk away過去歷史證明正確。在經濟繁榮期,5月至10月股市仍可上升;反之,在經濟回落期,5月至10月股市跌幅擴大,因此唔排除恒生指數在5月5日26387點見頂。
  
商品唔同股票。石油、玉米、小麥、大米甚至黃金都係進銳退速,大部分商品分析員唔係睇錯市就係措手不及。商品從來唔係投資工具,而係對沖對象。例如農夫在決定種乜前,可透過拋空去保障未來收穫;反之,麵粉廠亦可買入未來小麥,以決定目前麵粉售價。近年對沖基金加入,令商品價格更加狂升暴跌,如非職業投機者,最好少沾手商品買賣,因為少於2%合約係完成提貨及交貨的,現貨價同期貨價出現很大差距亦係常見現象。尤其大米係交投極疏商品,資金湧入價格狂升,資金流走價格呆瀉,唔係一般散戶可以捕捉到的,所以千萬唔好加入炒米行列。
  
許多事實,你以為自己已經把握,其實你只係一知半解。例如一年有幾長?正確答案係三百六十五點二五天,此乃每四年有一閏理由。再問一日有幾長?正確答案係二十三小時五十六分鐘,較我地估計少四分鐘,即每年失去一千四百六十分鐘(二十四小時三分鐘)。失去呢二十四小時點辦?此所以每年2月我地只有二十八天理由,目的係將失去二十四小時三分鐘在2月份扣除。因此一年有七個月係三十一天、四個月三十天,2月只有二十八天(閏年二十九天)。雖然如此,每年仍差三分鐘,因此每隔四百八十年,我們又多一天閏日。簡單年、月、日,亦非各位所知咁簡單,更何況股市循環周期、經濟盛衰周期?

美國樓市難言見底
  
今年4月8日大摩CEO John Mack認為,美國次按危機已進入第八局甚至第九局初,好快便會完成。5月份大摩卻叫客戶減持金融股,理由係話我地只在第三局。相差僅一個月,前後分析出現矛盾。
  
雷曼兄弟CEO Richard Fuld話:「The worst is behind us.」高盛CEO Blankfein話:我地已接近尾聲。摩根大通CEO戴蒙話:次按危機已完成75%到80%。美林CEO話:「The worst is over!」  真係咩?我地連今夕何夕亦搞唔清楚,何況次按危機及美國樓市泡沫爆破?各位仲記得1997年第三季至2003年第三季期間,有幾多人話本港樓市已見底?答案係每年都有人講,包括1997年聖誕節前、1998年年中、1999年年底、2000年年初、2001及02年,反而到2003年3月卻好少人再講,但卻於該年第三季本港樓價見底。今天我地只知道美國樓價在2006年6月見頂,至於幾時見底則木宰羊。不過,Countrywide Financial股價只及2007年2月十分一,Lennar Homes只及去年2月28%;大企業如美林、花旗、瑞銀等股價亦只及舊年高價一半左右。大企業CEO一如你同我,一樣冇預測能力。
  
5月份美國密歇根大學消費信心指數跌至59.5,係十七年內低點。新屋動工量上升8.2%,至年率一百零三萬二千百間。上周六三藩市聯儲銀行主席葉倫亦同意美國樓價下跌可一直伸延到2009年,無形中否定各大企業CEO估計。