投資者日記 曹仁超 2008-5-16
商品市場 散戶禁足
5月15日，周四。今天恒生指數又一次低開高收，收市指數跌19.77，收25513.71；成交801.5億元。5月期指升40點，收25500點。相信港股步入牛皮市。
今年4月恒生指數升12.72%，係亞洲中表現最出色；反之，3月份被十分睇好台灣加權指數只升4.67%，雅加達更跌5.83%，最差係菲律賓跌7.87%。台灣CPI上升3.86%，令新政府5月20日上台後必須收緊銀根，因為近期油價上升，而政府呢方面漸漸控制唔住，希望同大陸加強聯繫後，可令6月份台灣經濟好番D。
明知燈係火唔使周圍撲
有時明知燈係火，唔使周圍撲！3月份有幾多人棄港股而睇好台灣股市，結果4月份亞太區股市表現最出色係港股，有時真係……。
自去年8月聯儲局積極回應次按危機，令美股3月17日起回升。踏入5月，VIX指數已大幅回落到60天移動平均數之下，代表反彈完成，進入個別發展格局，股價將隨個別業績公布而作調整。
中國地震對保險股影響係點？一時間好難分析。相信平保（2318）所受影響甚微，國壽（2628）亦一樣，因為小鎮人口好少有購買保險習慣，反而刺激往後日子中國人買保險意識。
高盛證券認為，地震對內房股影響較大，建議減持中國海外（688）、遠洋地產（3377）、SOHO中國（410）及富力地產（2777），因為地震令內地買樓人士情緒低落，影響今年第二季及第三季買樓欲望。
Credit Agricole認為，中國未來入口將減少，因通脹壓力上升及消費欲望下降，令中國經濟步入軟陸期，進一步令固定投資減慢。4月份零售數字升22％，表面上睇幾好，但扣除CPI因素，升幅只有13.5％；睇中國消費市場亦步入放緩期。
滬深三百指數今天跌0.7％，收3948.09。
細價股必須精挑細研
花旗集團推介和黃（013），估計今年每股獲利2.65元，下跌63.1％，未來O二十九點八倍，明年純利可回升至每股4.49元，上升69.3％，O十七點六倍；投資者可利用今年純利回落期作收集，目標價90元。騰訊控股（700）今年每股獲利1.218元，上升34.2％，O四十七點七倍，目標價75元。中海石化（3983）估計今年每股獲利36.6仙，上升16.1％，O十點九倍，目標6.2元。建滔（148）今年每股獲利3.77元，上升16.8％，O九點一倍，目標價44.9元；建滔積層板（1888）估計今年每股獲利68仙，上升11.7％，O八點三倍，目標價6.4元。
去年8月次按危機影響下，聯儲局決定利用減息去壓低美元價，結果引發全球通脹去抵銷樓價下跌壓力，上述策略係咪可行？Kessier公司投資專家Robert Kessier（佢負責為有銀士管理投資）研究過去三十年情況，例如1981-82年次大幅減息、1990至92年減息3厘、2001至03年減息5.25厘，以及呢次由舊年9月至今減息3.25厘。減息雖可令股市上升，但經濟卻需要更長日子才能復元。呢一次減息行動令汽油及食物價格上升，已令通用汽車股價較去年高價下跌超過50％，加上樓價回落令信貸收緊，引發金融業出現巨額虧損，上述連聯儲局亦無能為力。何況1980年代、1990年代美國人仍有較高儲蓄率及流動資產，呢一次卻欠缺儲蓄及好少流動資產，一直過分依賴信貸去維持消費。佢認為，呢次美國經濟不能單憑減息及壓低美元價就可復甦；呢次的確同過去幾次唔同。
羅素二千指數由3月份起形成上升軌，踏入5月細價股更有較出色表現；點樣從中搵出the good、the ugly而唔會買入the bad股份？必須精挑細研，認真唔容易玩。
格蛇認為，今年美國經濟正陷入溫和衰退期中間，並認為下半年美國經濟將繼續呆滯不前，而信貸危機仍未過去，未來GDP增長率可能接近零，直到美國房價穩定落為止。《華爾街日報》調查五十五位經濟學家意見，佢地相信今年第二季GDP增長率只有0.1％，只有21％認為房價今年內見底，67％認為明年才見底，12％認為要到2010年。
4月份美國CPI只升0.2％（3月份升0.3％），但能源及食物價格仍上升。例如天然氣售價升4.8％，雖然4月份汽油價格已下跌2％（但5月份已回升）。
前列根總統經濟顧問、現任哈佛大學教授及美國國家經濟研究局主席費爾德斯坦認為，今年同明年美國經濟仍將逐步下滑，即使利率已由5.25厘回落到2厘。
IMF今年4月份報告亦認為，美國經濟將繼續放緩，並一直維持到明年。
凱恩斯名句：“There is nothing so disastrous as a rational investment policy in an irrational world.”（一個非理性世界作理性投資係災難）。全球超過十億人口以每天少於1美元去維持生活，其中80％開支用於食物上；美國卻用玉米去生產生物燃料供汽車用，令玉米價格大升，推高禽畜肉價，跟住係小麥價，然後係米價。根據聯合國報告，要用二百三十二公斤玉米才能生產五十公升乙醇；二百三十二公斤玉米足夠貧窮國家一個孩子一年食糧！今年全球20％玉米產量用作生產乙醇，到2015年將有45％玉米用作生產乙醇。
不但如此，我地需要三萬三千立方呎天然氣才能生產一噸阿摩尼亞，然後轉化為化肥，上述肥料卻完全可利用禽畜糞便取代；反之，禽畜糞便不加處理卻污染大自然。世界就係咁荒謬！
根據高盛證券估計，生產一桶乙醇以依家市價計需80美元玉米、145美元小麥或230美元大豆；反之，巴西用蔗糖生產乙醇成本只係35美元一桶。點解唔向巴西入口乙醇，而須自行高價生產？美國生物燃料政策歐盟亦獲通過，即歐洲將繼美國之後運用大量食物去生產生物燃料！OECD國家人民可能發現麵包價貴100％而無傷大雅（因OECD國家人民花食物上開支只佔總收入15％），但貧窮國家人民怎辦？中國人28％收入花食物上、印度人33％收人花食物上，非洲唔少國家人民64％收入花食物上。唔同國家人民同樣面對食物價格上升100％，但感受唔一樣。
食物價格難以大跌
另一問題係糧食增產涉及水資源。今年澳洲因乾旱而令小麥產量減少50％。中國面對水染污、糧食增產能力已十分有限。沙地阿拉伯人口近幾十年增至二千八百萬，糧食由十年前自給自足變成依賴入口，估計到2016年100％食物來自入口，自己唔再生產（因缺乏水資源）。
1976年三十億亞洲及非洲人以五穀為主要糧食，今天隨生活水平提升而食肉。我地需要三公斤玉米去生產一公斤雞肉、八公斤玉米去生產一公斤牛肉……。以日本人為例，過去五十年蛋白質消耗量上升十倍，新一代日本人飲食習慣已改變，一如歐美人士（無肉不歡），亞洲及非洲其他國家人民亦步日本人後塵，大部分人均染上無肉不歡飲食習慣。
所謂榖賤傷農，過去OECD國家政府大量補貼自己國家農民，令世界糧食價格扣除通脹自1961年起大部分日子都下跌，其他國家農民實質收入自1961年起不斷下跌。近日農產品價格雖然上升，扣除通脹後仍只及1974年56％（更加唔好講同1961年比較），但已叫貧窮國家人民無法負擔，你說怎辦？
去年下半年係投資農產品最佳時刻，不過今年2月起，農產品價格已面對個別發展，例如大米漲價同時小麥卻跌價。農產品合約交投額並唔大，面對大量資金流入商品市場，可令該產品迅速漲價，一旦資金流出又可引發急跌。散戶應避免涉足該市場（1973年至今我老曹曾三次進軍商品市場，結果係三次皆敗北）。我老曹唔掂，當然唔代表其他人亦唔得，只係想提點大家，商品市場往往變幻莫測。
瑞信認為，玉米價格仲會進一步上升。以油價120美元一桶計算，汽油批發價3.12美元一加侖，乙醇只售2.51美元一加侖。用玉米生產乙醇仍有利可圖，直到玉米升至8.2美元一蒲式耳為止。各位唔好期望可見將來食物價格大幅回落。
去年12月至今鋼材價格升幅達40％至50％；加上今年4月份起鐵礦石價格上升71％，鋼材價格升穿1000美元一公噸指日可待，令鋼材股全球皆升。反之，需要大量鋼材行業例如造船業及汽車工業股，則進一步受壓。
四川地震進一步刺激鋼材股價上升，因全球大部分鋼鐵廠都建地震帶之上，令用鋼量多企業積極購買多D鋼材存貨。
金價又點睇？自金價見1036美元後急跌至860美元，並呢個水平上上落落。剛宣布今年第一季業績全球最大金礦公司，今年首季出售19.4億美元黃金，因為毛利率上升119％，令淨收入較去年第一季上升444％而獲利5.37億美元。即係話當金價850美元以上，金礦公司會大量拋售黃金，因此唔排除金價有機會下試730美元（一旦油價回落話）。
救災不忘思想教育令人嘆息 中國4月份CPI上升8.5％，其中食物上升22.1％。新加坡UOB銀行估計，人行缺乏加息條件，除提升存款保證金率外，就係讓人民幣加快升值，未來升幅估計達7％。更何況希拉莉及奧巴馬皆支持China Currency Manipulation Act 2008法案。即係話民主黨如勝出，2009年第一個法案可能就係針對中國人為地操控人民幣價。美國國會研究部1月9日公布，認為人民幣價兌美元偏低15％到40％；G7今年4月份會議宣布，歡迎人民幣加快升值。睇人民幣繼續面對升值壓力。
四川地震事件暴露中國迅速市區化代價！隨工業內移，大量小鎮中國中西部湧現，為附近農民提供就業機會。但呢D小鎮興建過程中，建造安全條例冇嚴格執行。七點八級地震令四川省死亡人數超過一萬四千人，受傷者六萬四千七百四十六人，仍有二萬六千人埋瓦礫之下。例如汶川市二萬多間房屋接近八成倒塌，超過五成人口失蹤，至今已掘出二千多具屍體；當地學校等建築物亦冇抗震設施。中國呢類十幾萬人口小鎮近年大量湧現，市鎮人口大部分人均收入只有4140元一年（而大城市卻係13786元一年），呢D小鎮人口卻佔全國人口60％以上。如要求佢地建築物有防震設施接近唔可能，一旦遇上地震只有聽天由命。
呢次中國政府以交通理由拒絕國際救援人士入境，恐怕係另一錯誤決定。國際救援專家有專業訓練尋人犬及其他專業器材，例如心跳探測器、二氧化碳尋找機、尋熱設備等，可以極短時間內將人搵出來，上述並非十萬名解放軍可以做得到事。但中央認為救災必須符合「正確群眾思想」，強調「團結統一及穩定」；甚至報道災情亦必須有積極性及有鼓勵性，即救災不忘思想教育！有時都幾令人氣結。
香港社會正進入人口老化期，同時我地較上一代長壽。通脹令大部分人儲蓄未能應付自己活到八十五歲開支，因此六十到六十四歲港人60％仍繼續工作，六十五到七十歲港人20％仍繼續工作。退休年齡不但早由五十五歲延遲到六十歲，60％更延遲到六十五歲，20％延遲到七十歲。較長工作年齡係人類更長壽其中一個代價，問題在於愈係高收入人士，到六十至六十四歲薪酬必較六十歲前高才可挽留人才；反之低收入者一旦超過五十歲，收入便迅速下滑。如六十歲以上仍需要工作，更面對僱主歧視……六十五歲或以上只能搵到極低薪工作。同樣係老人，收入卻兩極化。資歷豐富者到六十歲本身已擁有唔少財富，要佢地繼續工作必須付出高薪；反而少積蓄普通人因十分需要收入維持生活，被迫接受低薪工作，情況十分普遍。