投資者日記 曹仁超 2008-5-27
人類史上首次人車爭食
5月26日，周一。恒生指數跌586.76，收24127.31；成交766.8億元，睇延長交易時間十分鐘作用唔大，今天成交額未見回升。5月期指下跌350點，收24259點，高水。周二港股反彈機會似乎甚大。
今天中移動（941）跌10.2元，報114.9元，單係中移動股價已可拖低恒指逾200點。
滬深三百指數跌3.15％，收3559.22。
低糧價時代宣布結束
油價再升，因尼日利亞局勢緊張，加上墨西哥產油減少。一場「沉默的海嘯」正席捲全球，國際稻米價已上漲三倍多，世界銀行預測糧食價格今、明兩年仍居高不下。長達三十幾年低糧價時代宣布結束，高糧價時代來臨。
根據聯合國糧食組織數字，2006年全球糧食產量二十億一千二百九十萬噸；2007年二十一億零八百五十萬噸，上升4.7％，可見糧食供給並冇出現缺口，只係有一億噸糧食用作生產生物燃料，出現人類史上第一次汽車與人爭食！再加上一些糧食出口國限制糧食出口，以及國際投機資金炒賣。
據花旗研究報告，今年首季流入石油、金屬及農產品市場資金高達700億美元。美國投機者已持有美國一半以上農產品期貨，形成全球食貴米。聯合國糧食組織估計，未來十年糧食價唔會回落到危機前水平，令依賴進口糧食國家在糧食方面支出今年上升40％。窮者愈窮，富者透過投機炒賣愈富。
中國內外資稅制統一，導致「特區」不「特」，深圳正一步步失去低稅地區吸引力，加快令製造業離開。至於能否一如香港轉型為服務業為主經濟？依家正在摸索中，因深圳稅率高達25％，較香港16.5％高。
高盛擔心中國經濟增長率放緩，會影響零售股如百盛（3368）、新世界百貨（825）及其他零售股。大摩推介佐丹奴（709），因今年第一季營業額上升15.1％，4月份則升10％；同時擔心地震令CPI高居不下，令A股回落而加重H股調整壓力。瑞銀則認為，地震將刺激水泥股、鋼鐵股價上升，因為炒重建概念。花旗推介中興通訊（763），估計今年每股獲利1.123元，上升21.3％，O二十八點一倍，目標價37.14元；但高盛建議沽出該股。
中移動近日回落，理由係重組後中國電訊市場將由三大集團分享。中移動母公司收購鐵通後，情況將同其他對手接近，令過去優勢漸失，因此成為基金拋售對象。
美元價又再回落，分別見1.578兌1歐羅及1.9824兌1英鎊。我老曹上月分析美元價時相信已見底，但反彈乏力。人民幣亦一如估計上升，今天成6.938兌1美元，係2005年7月以來最高。
外傳即將公布S&P╱Case-Shiller指數（反映美國二十個大城市住宅樓價）今年3月份較一年前下跌14.2％。5月份商會信心指數估計回落到60（4月份62.3），係1993年8月以來最低。芝加哥期貨市場內，有42％估計5月23日美元利率不變（上周比例為31％），加息四分一厘機會由42％下降至39％。
英國樓價出現第八個月回落，5月樓價平均跌0.5％，至172200英鎊（約265萬港元）；倫敦樓價更跌1.9％，係2005年11月以來最大跌幅。交易完成時間則由一年前需要五點八星期增加至九點八星期。
野村證券分析，2007╱08年度一百三十間日本企業因互控而損失32億美元，Topix指數2007╱08年度下跌29％。日本企業之間互控由十九世紀開始，代表企業之間互相合作及支持；1990年代起則成為日本股市一沉不起最大理由。2007╱08年度日本有一千七百二十二間公司在東京交易所上市，有二百七十三間股價跌幅超過50％、九百四十七間跌幅超過30％。
中國經濟由2007年過熱到2008年開始進入冷卻期，食物價上升22％，令4月份CPI上升8.5％。雪災加上西藏騷動，再加埋四川地震，令通脹壓力加大，如處理欠佳，分分鐘可引發社會不安。因此人行被迫加快人民幣升值去減少CPI上升壓力，甚至不惜犧牲GDP增長率。另一方面，內地銀行存款準備金率已達16.5％，分析界認為一旦升至18％，便會引發信貸擴張期結束，成為駱駝背最後一根禾桿草。滬深A股熊市去年10月已開始，最近一次反彈只係前跌幅31.8％，屬最弱反彈。至於港股熊市去年10月亦開始，熊市二期反彈只是前跌幅50％，屬中性，即較滬深A股強。大氣候與小氣候之分：大氣候乃大勢，有牛熊之分，「呢次唔同」呢句說話唔知害死幾多投資者。至於小氣候乃行業盛衰，其他仲有個人得失，例如資源股低潮在1999到2000年，目前剛完成七年牛市。所謂牛熊共舞（在牛市中有唔少行業仍在回落；在熊市中仍有個別行業在上升），此乃小氣候。除上述外，仲有個人智慧，例如李實發過去日子發達又唔見你發達？四叔幾十年來賺大錢又唔見你好環境？
分析股市大勢首重大氣候
分析股市大勢，首重分析大氣候（即牛熊市）。此乃查理斯．道一百多年前發現，過去一百年唔知幾多人認為牛熊市分析係「老餅」，但股市最後贏家往往係「老餅」。年輕人如睇唔起「老餅」，最後必然滅亡（Old soldier never die）。點解老兵不死？因經驗豐富。另一影響投資界泰斗乃畢非德老師，佢強調價值投資法。其他分析界名人有John Magee形態分析（Bar chart）及日本老掉大牙陰陽燭等；較近期有RI（強弱勢）、RSI（相對強弱勢）、MACD（由移動平均數組合演變出來），其他仲有拋物線理論及近年我老曹推介牛眼投資法，總之各適其適……。所謂牛熊共舞早在八十年代外國已流行，叫做「sector analyse」，當年譯做「行業性盛衰」。有D英文中譯唔係咁好：例如「Liberal」應譯成「胸襟廣闊」，而非「自由、開放」；「Conservative」應該譯成「保存良好事物的態度」而非「保守」。成功分析員性格上既要Liberal，同時亦要Conservative。唔少古舊事物，只要係好便應保存下來，做人態度唔應該否定過去。同樣，新的事物只要係好亦應該接受。做人既不可食古不化，亦不應郁D便「除四舊，立四新」！分析工具只有好與唔好之分，而冇新舊之別。行業盛衰分析必須對被分析行業十分了解才可，因為股價往往走在業績之前（即公布業績之時股價早已反映）。有些行業例如公用事業，由純利見頂到減少需時二十八個月、製造業純利見頂到減少需時二十個月、銀行純利見頂到回落需時十九個月；科技股同原材料股則係反應最快行業。換言之，從事行業盛衰分析者，要跑在行業純利走下坡之前許多才有用，此乃牛熊共舞分析由1980年代至今一直無法成為主流分析理由。記得七十年代跟森池兄共同分析未來運油之路的改變，用三個月時間去做資料搜集，結論係航運業將走下坡，但當年根本冇人信，直到會德豐船務、東方海外、華光航業等紛紛出事後才有人提。
我老曹當年亦曾叫森池兄唔好推介寶光（084），該公司從事投資生產電子表，因我老曹服務投資公司老闆亦有電子表廠，正面對電子表售價大跌（由500元一隻到1974年跌至10元一隻），結果被當年證券公司老闆改到一塌糊塗……。做一個出色Sector analyst並唔容易，必須平均要有走在公司業績之前八點六個月的眼光（IBES統計數字）。因此，能真正掌握牛熊共舞分析員少之又少，事後孔明就多。
掌握牛熊共舞分析員少之又少
倫敦每天外市場成交約11000億美元，佔全球總數32％；倫敦證券成交亦佔全球證券交易40％（佔全歐洲債券交易70％）。估計GDP達到3360億英鎊，佔英國全國GDP 28％。如倫敦金融業出現衰退，對英國經濟影響係點？香港1997年後亦漸漸走上倫敦之路。1973年前香港經濟由出口貿易帶動製造業為主。1973年前由洋行（俗稱三行）主導香港經濟，怡和洋行、和記洋行及會德豐洋行等在外國接訂單，本港工廠則向洋行接單生產……，並由洋行提供資金周轉。
1973年石油危機後，香港三行時代結束，其後進入「四大支柱」期：即旅遊及服務、地產及建造、金融及製造，香港的洋行則開始走下坡。怡和洋行將旗下九倉（004）由貨倉業轉為今天海運中心，成為商業、寫子樓、酒店、住宅混合體。和記收購黃埔船塢後走向房地產發展。會德豐則以航運業為主。當年太古實業（B&S）亦開始將太古船塢改為太古城住宅物業，並將回籠資金投資國泰航空（293），發展航空業。1970年代亦係本港華資地產商開始冒起期，因和記企業在轉型過程中在印尼出事，加上1974年與寶馬石油公司合併唔成功，最終令控制權易手；會德豐因過分投資航運業，1980年面對第二次石油危機，損失慘重；怡和則因太早睇淡香港1997年7月後主權回歸，不但失去九倉控制權，連置地控制權亦一度不穩。太古洋行為保存自己控制權而發行B股保護（同A股有相同投票權，但價值只及A股十分一）。
香港金融業日益重要
1984年7月中英聯合聲明草簽，限制香港政府賣地每年五十公頃，令香港住宅樓售價由1984年7月至1997年7月每呎由600元上升到每呎12000元，上升二十倍。呢段日子為華資地產大戶帶來驚人財富，八十年代香港亦進入地產成為經濟火車頭日子。1997年7月1日因賣地限制取消，取而代之係每年供應八萬五政策，令香港樓價開始大幅滑落，直到2003年9月特區政府推出孫九招為止，用勾地取代賣地，令香港土地供應重新受限制，本港樓價又再上升，但已無法同1984年7月至97年7月段日子比較，只可用「復興」兩字去形容呢段日子，而且升幅更集中在豪宅及甲級寫字樓方面。
點解樓價升幅只集中在豪宅及甲級寫字樓？因1997年後香港仍能一枝獨秀只有金融業。由於內地企業大量來港上市，令香港漸成為國際金融中心，與紐約、倫敦組成一個二十四小時環球金融交易圈，香港迅速紐約化或倫敦化，令主宰本港經濟盛衰權杖落入金融業手裏（房地產由1984至97年主宰香港經濟地位，依家變成依附金融業。1997年後係金融業盛衰帶動房地產升降，而非1997年7月前由房地產盛衰主宰香港經濟）。回歸後香港金融業佔全港GDP比重（政府數字係22.7％，我老曹感覺遠超此數）日漸上升。
一如英倫銀行行長金格所講：「我地對於影響英國經濟咁大的金融業，可以控制實在很小。」香港金管局相較英倫銀行可以控制的更小！在聯制度下，甚至連港元率同利率亦唔受香港金管局控制！資金流入，香港金管局無法阻止；資金流走，金管局可以做亦唔多。最威水係1998年年打大鱷行動，能夠成功有DD僥幸（因1998年9月俄羅斯債券出現危機，令美國聯儲局由抽緊銀根改為放寬，去挽救長期資本管理）。
香港經濟係海島式（無可避免唔受外圍因素影響）。今天影響未來香港經濟有兩大力量：一、美國次按危機；二、內地通脹率問題。去年8月至今兩大因素早已引發本港股市大波動（swing），港股可以忽然狂升，又可以忽然暴跌。有人在狂升、暴跌股市中賺大錢，但有80％小投資者並唔係smart traders，結果往往係買落輸多少。經過大波動後股市必然係平靜，今年5月開始港股會否走向平靜期?!美元利率回落期告終，美元貶值期已近尾聲；金價上升期告終，油價上升期係咪近尾聲？如你係smart traders，根本上唔使睇「投資者日記」（因為你仲醒過我老曹）；如你只係80％買落輸多少散戶，我老曹亦無法令你成為醒目炒家。當進入平靜的投資市場，已難以搵到可以double資本機會，有時都幾無可奈何。