投資者日記 曹仁超 2008-5-13
大尾巴作怪
5月12日，周一。國家統計局宣布4月份CPI上升8.5%。人行宣布5月20日起上調金融機構人民幣存款準備金率0.5%，至16.5%，此乃今年內第四度上調。
滬深三百指數今天升26點，收3904.92，睇技術反彈仍在進行中。
中國今年4月私家車銷量較去年同期上升8%，至四十三萬九千二百七十九架，係三十五個月內首次升幅單位數。5月份勞動節假期估計銷量可回升，不過內地汽車製造股高峰期已過去。
國際金融中心熱
《21世紀經濟報道》透露，北京市委已正式下發「關於促進首都金融業發展意見」。睇內地除上海、深圳外，天津及北京亦有意成為全國（或區域）金融中心。
中國最先金融市場深圳開始。1990年代上海開發浦東時，提出建設國際金融中心口號，並獲國務院認可，其後深圳、天津以至西安，都提出要成為區域金融中心。中央呢個問題上一直未表態，即唯一獲國務院認可只有上海。呢次由北京市提出，上述問題又火熱起來，會否一下子全國各大城市都出現國際金融中心熱？
花旗推介遠洋地產（3377），估計今年每股獲利55.8仙，升2.2％，O十點九倍，目標價10.22元；中化化肥（297）今年估計每股獲利32仙，升48.4％，O十九點一倍，目標價7.6元。
3月份VIX指數嚴重超賣後，大市出現反彈；到5月VIX已迅速返回正常水平，即拋空者已完成補倉。恒指由5月5日至今下跌速度亦幾急；標普五百指數走勢係頭肩頂破頸線（1430點）下跌後反彈，接近200天線水平反彈完成。
三大股市港股最弱
受到「Sell in May」影響，道指由5月2日13132點開始回落，不過由今年3月10日開始所形成上升軌至今未破（除非12700點失守）；反之，恒指雖然由5月5日26387點才開始回落，第一天（5月5日）已跌穿上升軌支持位，上周五收市指數25063點。滬深三百指數雖然由5月6日4075點回落，至今仲係上落市，即三大股市中以港股最弱。
債券大王格羅斯認為，3月份開始上升市只係熊市反彈，認為「最惡劣日子已過去」言論係唔成熟。美國第五大建築公司K Bhome創辦人Eli Broad比華利山Milken Institute Conference話，美國有大量未售出住宅，需要三到四年才能完成清理，佢唔認為美國樓價已見底！雖然高盛證券CEO Lloyd Blankfein及基金界泰斗麥樸思認為最惡劣日子已經過去，但世界銀行前主席James Wolfensohrn就唔同意，並認為次按市場虧損最終將達到1萬億美元，IMF估計虧損可達9450億美元。
上周三CDX.IG 10指數（代表一籃子投資級CDS）出現大波動，係4月8日以來最大一次，睇麻煩又再開始。CDS（Credit-default swaps）在2000年規模只有1萬億美元，近年發展成為62萬億美元市場，成為投機者資金最主要來源。上述產品1990年代中出現，在二十一世紀迅速發展貝爾斯登、MBIA、Ambac、Countrywide Financial公司出事後，相信CDS市場自去年8月起進入萎縮期，因投資銀行、保險公司都在拋售CDS。咁情況下，相信短期內美國股市唔會出現牛市。
美國財長保爾森、JP摩根大通主席Dimon都認為，次按危機已經過去。記得2001年3月科網股分析界權威Macro Mavens亦認為納指已完成跌幅，但2001年3月至02年10月納指卻再跌50％。達官貴人往往高興得太早、醒覺得太遲！
4月份美國申請破產保護令公司高達五千一百七十三宗，較去年同期升49％！美國經濟學家威廉．鄧克伯格表示，經濟增長期只能勉強維持生存公司，經濟低迷期往往被市場踢出局，呢個正係依家所見到情況。去年8月開始次按危機，正逐漸對美國小型企業構成打擊。
中國商務部研究院研究員梅新育指出，次按危機對中國經濟影響正在擴大，小心海外機構投資者大舉拋售在華資產，將資金調回母國。此舉可令人民幣不升反跌（上周三曾一度急跌，暗示投資及貿易流出現變化）。商品價格上升，加上中國自然資源有限，已引發通脹經濟，令中國資本市場見頂，引發投資者拋售。
中國國際金融公司首席經濟學家哈繼銘認為，次按危機對中國經濟影響正在浮現；去年規模以上工業企業利潤升幅只有36.7％（上半年43％），今年首兩個月更只有16.5％。小心今年下半年進入單位數字升幅。
美國GDP增長率每下降1個百分點，中國出口增長率便下降5.2個百分點。如美國今年GDP只升0.5％，中國今年出口升幅將較去年減少8.8個百分點。謝國忠認為，中國仍係一個靠出口帶動型經濟，經濟核心仍係出口，通過國家體制投資公路、橋樑、電廠等去支持出口競爭力。如出口量減少，其他投資亦將慢下來。
歐羅區內德國經濟仍保持良好，但西班牙已進入衰退，意大利到達衰退邊緣，法國消費也大幅放緩。德國42％出口到歐羅其他國家，例如西班牙佔德國總出口7％，擔心最終連德國亦無法保持GDP增長。
OECD國家因擔心次按危機而紛紛減息，但新興市場如中國、俄羅斯、印度等因擔心通脹而紛紛加息，主要係油價同食物價格大升。睇新一輪風暴5月形成中。上周五油價見126美元一桶，油價創新高環境下，財富由OECD國家大量移到中東產油國。九年前油價10美元，今天高盛證券預測油價五年內見200美元，因為今天不但OECD國家需要石油，中國同印度亦需要，結果油價愈搶愈高。
點解大部分投資者皆輸錢？來自Vantage Consulting firmMark Finn研究所得，就係追熱門投資項目代價，以及忽略基礎分析。
Gary Hirst博士由1991年起利用電腦去分析技術分析系統，例如猜測指數（Stochastics）、RSI、波浪理論（Elliot Wave）等，結果卻令人失望。
長遠而言，真正出色投資者只佔20％！呢20％表現出色投資者中，只有3％能夠透過投資致富，即一百個投資者中只有二十個跑贏大市，上落市中能致富者只佔3％。大部分富有者係透過經營本業（例如本港地產商、廠商、零售商等），只有極少數係透過投資致富。
愈近升市尾聲投入愈多
即使上升市中（例如美國1982到2007年），80％投資者仍跑輸大市，其中理由係因為「大尾巴」（fat tails）理論。即係愈接近升市尾聲，你投入資金反而愈多，結果將大部分利潤輸掉。例如1982年用10萬元開始，要贏幾多次才變成20萬元？再贏幾多次才變成40萬、80萬、160萬、320萬元、640萬、1280萬元？只要輸兩次、每次損失50％，你便變回只有320萬元！你投資愈成功，你尾巴便愈大，只要輸一次，你損失便十分驚人！幾多香港人1997至2007年失去由1967至97年所賺得一切？！又有幾多人去年10月到今年3月內失去2003年4月到07年10月所獲利潤？上述都係「大尾巴」在作怪！
何況香港1997年起、美國2000年起，股市已變得十分周期性（cyclical），令買入後持有（buy and hold）者唔易賺錢，只有低買、高賣者才可。可惜80％投資者卻係高買低賣！投資者往往股市大旺市時入貨、股市低潮時減持。
子女主動關心父母好過請飲茶 母親節過去了，做子女點樣慶祝母親節？新論壇上星期曾訪問六百名父母，子女行為中邊一項最令佢地開心或擔心？結論大家不妨參考。
一、最令父母開心係子女主動關心父母，與父母談天。原來父母最開心係同佢地談天唔係請佢地飲茶。
二、有好品德和道德價值觀。子女只要生性做人，父母已好開心，唔使發達買豪宅畀父母住。
三、子女能獨立自主，唔使父母擔心。原來只要養活自己，父母已經好開心。
父母最擔心係乜？排第一係濫藥。作為子女只要濫藥，已可傷透父母心。第二係沉迷賭博。第三係經常唔返屋企。
原來令父母開心好簡單，只要能做到前三項或戒掉後三項，你父母已經好開心，要求一D都唔高，點解仲有咁多子女做唔到?!
愈接近升市尾聲，投資者投入的資金反而愈多，結果將大部分利潤輸掉。