投資者日記 曹仁超 2008-5-07
選良棄莠
5月6日，周二。恒生指數升78.18，收26262.13；成交697.3億元。5月期指升106點，收26180點。過去四十五天係好友大反攻日子，恒生指數由3月18日20572.92上升到5月5日高點26387.37，升幅28.3％，出現上述升幅後，股市牛皮一段日子無可避免。5月5日26387.37係熊市二期反彈高位，抑或調整後再升？事後才知道。
從美股VIX睇，上阻力漸漸出現，即大市欲再上升話，將面對舉步維艱局面。未來日子市場進入個別股份嚴重分化期，股份因本身因素而出現個別發展，全面上升日子基本上結束，大市進入參差走勢，總之七上八落、亂七八糟。呢段日子正是玩stock picking時候。聖經有云：選出麥子、棄掉莠子。美元大幅下跌後今天，能源股、資源股價錢已唔便宜，係咪值得再追？經過去六個月高科技股大調整後，係咪又到可吸納日子？金融股又點？次按風暴係已經過去，還是只係風眼？
熊二不乏投資機會
內地房產方面，五一黃金周，北京及天津成交只較去年同期減少10-20％，而價格仍堅挺；蘇州及杭州連成交額亦上升；上海比較弱，但價格仍企穩；重慶三天內售出四百多單位，表現令人振奮；珠三角一帶比較弱，尤其廣州及深圳，似乎仍有下調壓力。內房股如首創置業（2868）、中渝置地（1224）、中國海外（688）、綠城中國（3900）、新世界中國（917）、華潤置地（1109）等，由3月低價至今升幅都大於恒指。由此可見熊市二期亦不乏投資機會。
滬深三百指數跌1.11％，收4010.89，由4月22日3122.39上升到5月6日最高見4062.66，升幅30.1％，今天出現調整好正常。熊市二期升幅可以係前跌幅31.8％、50％或61.2％，最終升幅幾多？事後才知道。
北京師範大學金融研究中心主任鍾偉估計，家中國境內熱錢規模可能突破6500億美元，較1996年年底東南亞熱錢5600億美元更多。爆發亞洲金融危機後，1997年下半年至98年年底流走熱錢數目達8000億美元。中國要小心熱錢未來突然流走問題。
南京大學金融與保險學系主任于潤教授認為，自去年10月份起中國對美國出口增速開始下滑，由13.5％降至11月份12％、12月份6.8％、今年1月份5.4％，到2月份更為負5.2％，3月份反彈至16.3％。反而同歐盟貿易仍在上升，今年首季升24.7％（3月份升35％）。1985至89年南韓圜升值25.3％、新台幣升值50％，並冇令南韓及台灣經濟受損。佢認為，人民幣未破六前，中國仍處於升值繁榮期，熱錢短期內唔會流走。
花旗推介信義玻璃（868），估計今年每股獲利57仙，升40.2％，O九點四倍，目標價10.3元。
我老曹同其他人意見上最大分歧，係比較上唔太擔心未來通脹率。我老曹唔相信類似七十年代滯脹會重演，因為今天聯儲局已較七十年代聰明，唔會再次讓CPI出現雙位數字升幅。我老曹亦唔相信九十年代日式經濟會美國重演，因為貝南奇較三重野康有智慧。但經濟盛衰循環卻無可避免。投資策略首先係避免經濟見頂時過分投入，亦要避免經濟見底時過分恐慌，上述不能單靠運氣，而要透過投資策略運用及嚴守紀律。我老曹自己永遠唔會恒生指數O二十二倍以上過分投入，如因此而錯過機會亦唔會後悔；亦唔會十二倍以下過分恐慌，即使明知短期不利；依家恒指O企十五倍左右。我老曹唔認為商品價格狂升係中國或印度因素，亦唔認為食物價格上升係因為美國乙醇計劃。真正理由係美元價下沉，令大量對沖基金要搵出路，大量對沖基金資金追逐商品價格，結果造成滔天巨浪！一上一落中，有人得有人失。換言之，商品價格狂升暴跌，The tail is wagging the dog反常現象！
中國人民大學馬克思主義學院教授陶文照認為，一個國家興起，首先係文化同價值觀改變，令生活方式、意識形態改變，呢方面叫做「軟實力」。上述改變漸漸令經濟繁榮起來，再建立軍事實力，呢方面叫做「硬實力」。硬實力有助推銷軟實力，令該國文化及價值觀獲其他國家認同，進一步鞏固該國世界上經濟地位，進而強化軍事力量。換言之，平服天下必需軟硬兼施。其中軟實力令大國崛起方面擔當角色更為重要。美國強大，理由係世人皆認同美國文化及價值觀，因而學習美國人生活方式，受美國意識形態所支配。今天可口可樂文化、麥當勞文化，甚至荷里活音樂、電影及電視文化、互聯網文化，一D國家開始受到抗拒及唔受歡迎，而美國就使用軍事力量去維持文化霸權，例如伊拉克戰爭。令人擔心係呢次次按危機將可能動搖美國經濟上霸權，一如互聯網文化最近香港艷照門事件引來衝擊，將令世人重新評估美國軟實力。
傳聖火反映文化矛盾激化
第二次世界大戰結束後，日本、南韓、東南亞等國家直接仿效美國制度。九十年代東歐國家亦放棄學習蘇聯，選擇美國；仲有印度同南美洲。即使撒哈拉次大陸四十八個非洲國家中，亦有四十多個接受美式多黨制選舉。九十年代可以講係美國軟實力全盛期，接近人人學習美式自由民主制度及市場經濟制度。可惜隨之而來卻係日本經濟停滯不前、亞洲金融風暴、2000年科網股泡沫爆破及2007年次按危機！反而唔肯接受多黨制中國經濟卻欣欣向榮，人們開始質疑美式自由民主制度係咪放諸四海皆準？
美式文化過分強調個人英雄主義，唔係超人就係乜乜救地球、享樂主義（包括借錢消費）、甚至濫交主義（所有美國電影、電視、音樂、廣告都強調呢點），同伊斯蘭教義及中國儒家思想背道而馳。中國一向強調犧牲小我、完成大我，克己而服禮，為未來而儲蓄，性方面更極之保守。二十一世紀世界衝突早已由資本主義與共產主義之爭，轉為西方基督教文化、東方儒家思想及以中東為首伊斯蘭教文化衝突。由於儒家思想主張兼容，與西方文化矛盾仍未激化；但基督教文化與伊斯蘭教文化衝擊愈來愈白熱化。近日有象係東方儒家思想同中東伊斯蘭教文化走在一起，共同對抗西方基督教式文化，呢點由「中國威脅論」、「中國崩潰論」西方大受歡迎足以證明。呢次傳聖火正正反映出唔同價值觀激化矛盾表面化。
西方民眾認為西藏人權遭到侵犯而向中國政府抗議，佢地口號係「Free Tibet」（令西藏自由），而非「Independent Tibet」（西藏獨立）。如以物質生活睇，改革開放後西藏物質生活較達賴統治時期唔知好幾多倍，中國人實在唔明白西方民眾所指西藏人權到底係乜？
東方民族過去二百年長期遭受西方列強欺壓，物質生活缺乏（睇睇鴉片戰爭後中國），人民長期生活飢寒交迫之中。對東方民族而言，「人權」就係人民生存權，追求溫飽生活（1982年內地官員來港勸港人唔好移民外國，理由係祖國保證1997年後港人一定有飯食！）。反之，西方民眾長期物質富足中過活，佢地人權係指個人自由及政治權利獲保障，因此佢地義不容辭地加入「Free Tibet」大隊。
人權問題被利用作反華
如中國政府唔好好處理東西方對「人權」分歧，對中國經濟前景將大大不利，好容易被別有用心人利用作反華，因為中國崛起正挑戰西方過去世界領導地位，好容易變成東西方衝突！今天中國冇足夠力量與西方列強搞對抗，應避免走上往日蘇聯之路。
中國政府應壓抑內地人民族主義，例如抵制家樂福乃十分幼稚行為，此乃狂妄自大表現。唔好以為改革開放三十年中國真係超英趕美，二百年前英國工業革命上偉大思想，一百年前美國新發明上貢獻，才令佢地建立世界強國地位。今天中國經濟實力上仲差好多，產生偉大思想上接近交白卷。中國只係全球OEM或ODM而已，連日本亦不如。
西方科學發展建基於西方人求是、求真，對唔同意見包容與證偽歷史，利用法律去保護少數及異見。中國人連容納意見雅量都未培養出來，一個毛澤東居然可發動十億人民大搞文化大革命，真係匪夷所思。中國人連反對別人意見、尊重別人發言權亦做唔到，都幾令人痛心。現代化最重要一項思想現代化，從呢次聖火傳遞睇都幾令人失望。
去年8月次按危機，因聯儲局介入而令大部分人認為冇事，令道指去年10月創新高。今年3月17日聯儲局介入令JP摩根大通可收購貝爾斯登，唔少人認為信貸不履行交易（credit default swaps）或其他場外交易衍生產品冇事，因為一旦出事，聯儲局便會用納稅人蚊年去救援（bailout）。
我老曹唔係認為政府不應干預市場，而係應該遵守當年香港財爺夏鼎基積極不干預原則——即係話如非必要最好唔干預。中國人認為嚴父出孝子、慈母多敗兒，因此唔少中國父親住大碌竹追住個仔成條街事件不斷發生，1989年六四事件政府更出動坦克車去對付手無寸鐵大學生……。我地認為嚴父係、慈母係錯。我地需要強勢領導、今天中國人已站起來，外國人不得依牙鬆弶。過去中國五千年強調嚴父政策下，扼殺下一代創意，例如中國人書法只能模仿古人，中國人畫亦係仿古，未敢創新。只有模仿前人才唔會撞板，結果令中華文化由過去先進變成今天落後。因為中國政府一向干預市場，中國嚴父則干預子女發展。積極不干預就係一方面讓市場有發展空間、讓子女可發揮自己所長，另一方面又不偏離常軌。一如咖啡中加奶，多則遮蓋咖啡香味，少則不能發揮奶味之滑，必須恰到好處。
嚴父政策扼殺下一代創意
最理想當然係政府唔使出手，市場自動調整。但市場亦非完美，如果有人操控以從中謀取暴利而政府任由市場發展，往往由一極端走向另一極端，咁就需要政府適當時刻出手糾正。以八十年代為例，1982年國際銀行危機、1984年Continental Illinois危機、1987年10月股災；到1994年墨西哥危機、1997年亞洲金融風暴、1998年長期資本管理出事。二十一世紀亦有2000年3月科網股泡沫爆破、2001年「九．一一慘劇」及2002年英隆事件，以至2007年8月次按危機、2008年3月貝爾斯登事件，都需要政府出手去干預。
一個過度監管（Over-regulate）市場死氣沉沉，一個監管不足（De-regulate）市場又危機四伏。呢次次按危機後，我地應進入再監管（Re-regulate）市場。一如英隆事件後，美國將工業股內唔列入資產負債表投資行為（off-balance-sheet investments）列為非法。次按危機之後，結構性投資工具（SIV）相信將受一定程度監管。未來監管機構對槓桿式投資，相信亦有一定程度上限制，以便讓衍生產品健康地發展同時唔會拖垮整個金融體系。至於呢段日子需時幾耐（糾正英隆事件亦需時三年）便木宰羊。