Google

2008年5月5日星期一

曹仁超.2008-5-5

投資者日記 曹仁超 2008-5-05


進入炒細價股期
  
5月4日,周日。熊市二期,分析唔再係強調市場方向,而係將注意力集中市場波幅(volatility)上。因為熊市二期往往有波幅冇升幅,例如3月17日股市出現嚴重超賣,至今為止已反彈前跌幅50%(一般可做到);至於能否反彈前跌幅61.8%?便見步行步。5月份二線股往往有較大升幅,主因係追落後心態。熊市二期贏家係time trader,例如Buy in March, Sell in May!但對散戶而言,做time trader較為困難,除要有分析股市能力外,亦必須有嚴守紀律性格,而大部分散戶往往高追低沽,毫無策略可言。
兩領袖股呈轉弱趨勢
  
4月21日至今上證指數升18.5%,見3693.11;恒生指數已升至三個半月高點26241點。中移動(941)由3月18日99.7元升至4月24日139元高位,上周五收市價136.1元已無力再升;國壽(2628)好D,由3月18日24.5元升至上周五35.15元,但已同成交額背馳。兩隻領袖股上周出現轉弱趨勢,由地產股如恒隆地產(101)接力,上周五升上33.75元,升6.5%;不過香港並冇追隨美國減息四分一厘。資源股亦睇唔到有幾大升幅……。估計5月份上證指數會挑戰4000點,恒生指數挑戰27200點阻力。
  
忽然之間好友大量湧現,令道指見13058點,重上200天移動平均線之上(熊市中,指數重返200天線之上乃常見現象,一如牛市中指數低於200天線亦係常見現象。美股200天線、恒指250天線從來唔係牛熊分界線;技術分析上亦無牛熊分界線呢回事)。有人甚至認為,由2002年10月開始道指牛市至今仍未死亡,因為道指跌幅小於前升幅50%(50%理論係1940年代由E. George Schaefer推介)。部分人認為道指由去年10月9日14164點回落到今年3月10日11740點只係一次大調整而已。是耶非耶?不過,如果去年10月冇減持,到今年3月相信損失都幾大。
  
澳門賭場愈開愈多,社會亦變得愈來愈有賭性。例如炒樓花、期權、期指,賭博性之高唔見得較去澳門賭場細。股市散戶如過江之鯽,每當股市震盪往往傷亡慘重。去年10月幾多股民曾樂不可支,今年3月已有人燒炭自殺,點知3月17日起一個鯉魚大翻身,恒生指數又上升6000點!今天理財應由風險管理開始,例如估計自己可承受幾多風險,而非短期內恒生指數可漲幾多?
  
聯儲局將Term Auction Facility增加50%,至750億美元,亦同意與歐洲央行進行外交換增加三分二,至500億美元;與瑞士央行增加一倍,至120億美元,以及接受其他三A級有資產支持證券作抵押品交換國庫券。上述做法目的係令倫敦銀行同業拆放利率回落,雖然美國聯邦基金利率已降至2厘,但倫敦三個月同業拆放利率仍高達2.815厘,甚至較3月18日聯邦基金利率企於3厘前仲高。去年面對次按危機時,貝南奇創造Term Auction Facility及兩種其他方式,目的係阻止市場突然之間流動性消失。佢認為,1929年華爾街危機演變成1930年代大蕭條,理由係股市突然崩潰令金融市場缺乏流動性所引發。反之,1987年10月股災冇變成重大災難,理由係聯儲局及時放寬銀根,2001年「九.一一慘劇」後情況亦一樣。呢次次按危機能否聯儲局即時反應下轉危為安?
  
次按危機到底係一次全球股市巨大調整,定係金融市場生態一次劇變,從此扭轉過去放大槓桿比率投資策略?上述爭論結果將主導5月份投資市場方向。睇好一方指出,自去年10月起道指所形成下降軌上周四已打破;納指頭肩底走勢完成,並已向上突破,有機會補回去年12月裂口2052點,即後市上升將由大藍籌股擴散到二線股(尤其係納指成分股)。道指下一阻力位係13552點,即去年12月26日高點,技術上睇,短期股市可進一步向上,並進入炒細價股期。
  
分析之道在於運用非常規諗法。所謂自古成功在嘗試;如你只追隨前人足,你永遠不能跑別人前面。但嘗試過程中自然不斷犯錯,犯小錯無妨,犯大錯則無法挽回,因此要用方法將錯誤局限小錯之內。我老曹方法就係止蝕唔止賺。投資亦須理性分析,但唔好以為真理一定在己方,真理可能別人邊亦唔奇,只有透過實踐才可印證。例如3月17日起,我老曹同森池兄雖同時睇好股市,但理據唔同;我老曹認為只是熊市二期反彈,升幅可能只有31.8%到50%,最大升幅亦只係前跌幅61.8%,即恒指最大阻力區27200點。進入5月份又係適量地減持日子。森池兄唔同意上述分析,佢認為3月17日恒生指數已見底,呢次跌市只係另一次短命熊市,牛市已由今年3月17日開始!最後時間老人會證明到底係我老曹定係森池兄;5月份相信係審判月。
  
4月30日聯儲局減息四分一厘後,係咪代表次按危機漸漸過去?我老曹仍未感覺到。最近數字仍證明美國樓價在回落中,只係美元進入負利率環境,但今年第一季GDP仍只升0.6%,代表進一步減息刺激作用唔大。至於5月份開始退稅有冇用?有待證明。
  
去年8月至今美指數已下跌7%(美元兌歐羅跌13%);油價今年升20%、金屬指數升24%、食物指數升18%,如再減息,擔心通脹率失控。呢次又減息四分一厘,若再減息副作用將極大,依家只有希望經濟本身能自動痊癒。最終結果到底係美國經濟踏入復甦期,抑或係完成反彈後又再下沉?睇只有耐心觀察。
  
如參考英國情況,則叫人放不下心。過去十年英國樓價上升205%(同期美國樓價只升103%),今天英國家庭負債比率係稅後收入125%(美國104%)。倫敦早於紐約成為國際金融中心,倫敦對沖基金及投資銀行活動佔英國GDP高達20%,一旦金融業員工收入走下坡或裁員,對房屋及零售業影響亦大於美國。過去十五年英國經濟繁榮有賴出售商業服務收入交換入口商品及消費品;過去商業服務收入不斷上升,反而商品及消費品入口成本卻不斷下降。但去年下半年起情況卻迅速改變,今年更加不容樂觀,金融業收入肯定走下坡,而商品及消費品入口成本卻上升。雖然英國樓價去年下半年才開始回落(較美國遲一年),次按危機受影響程度亦唔及美國,但英國金融業所佔GDP比重較美國大,萎縮速度亦較美國快!

接受批評挽回錯失
  
去年9月17日起美國開始減息至今,已減3.25厘,十年期債券息率如何?答案係由4.47厘降至3.76厘,跌0.71厘。三十年期債券息率又點?答案係由6.38厘跌至6厘,跌0.38厘。各位信唔信十年樓按因減息0.71厘、三十年樓按減息0.38厘,便可阻止美國樓價進一步下滑?上周四穆認為明年美國樓市復甦,已係最樂觀估計;如明年下半年仍唔復甦,擔心將進一步下滑。
  
標普將Countrywide Financial Corp信貸降至垃圾級,睇美國銀行只有全面收購Countrywide,才可阻止由該公司發行972億美元債券價格下滑,其中40億美元債券更將在短期內到期,擔心新一輪信貸評級被降級行動又再開始。
  
不如意事十常八九,冇人能百戰百勝,能夠做到只係盡量收窄虧損、擴大利潤而已。我老曹一向強調唔好信專家或名人,包括畢非德、索羅斯、香港四叔及《信報》曹仁超。因為佢地都只係人唔係神,佢地意見只供參考,而不可不經思考地全盤接受。甚至戰無不勝毛澤東亦經常犯錯,但我地較毛澤東幸運之處係因為我地肯接受批評,毛澤東唔肯。結果毛澤東一旦犯錯傷害便擴大,結果害中華民族足足十年。如果文革一開始發現係錯就立即停止,你話幾好呢!請記住,冇人可以唔犯錯,但有責任不讓小錯擴大成為不可挽回大錯。對所有人批評應虛心接受(無理取鬧者可以不理,但唔好動氣),只有咁樣才能更上一層樓。分析要理性,但不可以為自己擁抱真理,今天認為對事,明天可能發現係錯亦唔奇(今是而昨非)。唔好因為怕犯錯而諗都唔敢諗,因為自古成功在嘗試。

資源稅改革料下半年推出

財政部稅政司司長史耀斌話,資源稅改革方案已基本成熟。國家稅務總局局長肖捷亦指出,下一步稅制改革重點之一係改革資源稅制度,加大保護資源力度。聽講資源稅改革方案今年下半年推出可能性好大,徵收範圍也將較大,以配合宏觀政策下節能減排。
  
家中國資源稅係按開採量確定徵稅幾多,例如一個油田或礦山係按每噸固定稅額來徵收,即開採量愈多,徵收資源稅愈多,而唔理會價格升降。如從量徵收改為從價徵收,便會令價格愈升徵稅愈多,價格下跌徵稅愈少,造成集中開採富礦,窮礦冇人開採。不但如此,例如污染較大高琉煤價格較低,如改為價格徵收方法,高琉煤反而較價格更高低琉煤多人開採。如果仍按量抽,由每噸10元左右提高到20元甚至30元,將會令加工企業成本壓力加大。
  
日前財政部決定對中石油(857)及中石化(386)部分成品油實行環節抽稅先徵後返,透過退稅,補貼價格管制下成品油虧損,但補貼期6月底結束,下半年又點?屆時國際油價又會咩水平?油價倒掛背景下,政府不能要求中石油、中石化長期做蝕本生意,咁對兩間公司股東唔公平。但內地CPI升幅已8%以上,如下半年開放成品油價格,通脹壓力進一步增加。長期管制成品油價又講唔通,點解要犧牲兩大企業股東利益去補貼公共利益(低通脹)?咁情況下,兩大公司不如乾脆縮小業務,把損失減到最低,但咁樣一便導致商品短缺,汽車大排長龍入油情況又出現,對經濟損失更大。如只向低收入群眾提供補貼以紓解通脹壓力,結果更加強通脹預期心理……。換言之,最終內地成品油市場亦只有按市場規律辦事,服從國際油價升降,即下半年中國通脹率將進一步上升。
  
《新快報》引述中國人民大學教授黃平分析,勞動合同法落實中存在一D問題,應該修正。根據珠三角各地製造業協會提供數據顯示,今年珠三角有八千多家企業倒閉或轉移,與勞動合同法實施後企業成本大幅增加有關。今年上半年工業股純利又如何?