投資者日記 曹仁超 2008-5-24
補貼油企超過撥款災後重建
5月23日，周五。恒生指數跌329.05，收24714.07；成交752.6億元；5月期指跌349點，收24609點，低水；6月期指跌360點，收24530點。睇幾多人加入Sell in May行動。
中國海洋石油（883）跌6.6％，收14.76元；聯想（992）跌6.8％，收6.01元，因德銀建議減持；網通（906）升12.5％，見27.05元後停牌；聯通（762）升12％，見18.48元停牌；中國電信（728）升7％，見5.67元停牌；中移動（941）宣布，收購中國鐵通，股價下跌5元，收125.1元；中國資源（661）升48％，見0.37元；浙江玻璃（739）跌12％，見6.18元，公司宣布計劃集資3.82億元；電盈（008）計劃提高固網電話用戶及移動電話用戶之間互連收費25％，由每分鐘4.36仙升至5.45仙。IDC降低中國電腦銷售預測，因為筆記本電腦價格唔再大幅下跌，令消費者購買欲下跌。
滬深三百指數跌0.98％，收3675.15，開始補上升裂口，估計可見3500點。
花旗推介華潤置地（1109），估計今年每股獲利56仙，升93％，O二十二點五倍，目標價20.71元。
周四道指繼續蒲頭升24.43，見12625點，似乎係過去二天回落430點之後反彈；加上油價見135美元後，收市跌番落130.81美元，投資者由憂慮次按危機漸漸變憂慮油價對經濟影響；金價亦跌10.3美元，見918.3美元。UBS雖然宣布供股集資155億美元，但股價仍升1.9％，抗跌力逐漸出現。
地震死亡人數已超過五萬，仲有三萬多人失蹤，時間一秒秒地過去，失蹤人口變成死亡人口機會愈愈高。
內地石油補貼勁
5月12日四川汶川大地震發生當天，中國共產黨主管宣傳及新聞媒體負責人指令中國新聞媒體，做地震救災新聞報道時必須正面……。當都江堰市聚源中學星期二復課，地震造成學校樓房倒塌而痛失兒女幾百名學生家長舉行抗議，強烈要求懲罰建造、批准劣質樓房、導致大批學生死於非命責任者後，周三美聯社同《紐約時報》指出，中國政府又再收緊對新聞媒體控制。中國網絡作家田奇莊亦指出：上星期表現新聞報道自由只因新聞媒體報道大部分係正面，當新聞媒體開始報道中國紅十字會採購唔公開，以及痛失兒女學生家長舉行抗議開始時，新聞媒體採訪自由又再受到控制。5月12日至20日極有可能係內地新聞媒體採訪最自由一個星期。5月21日又再收窄。
4月份香港CPI升幅達5.4％（3月係4.2％），因食物價格上升19.4％，以及公用事業收費上升8.7％，上述係推高CPI主要理由。展望未來，巴士車費上升、租金上升及恢復徵收差餉，都可進一步推高CPI。
福無重至，禍不單行。今年年初中國既有雪災在前、後有股災，再地震……2008年只係過一半，災難已接二連三咁出現。
5月22日油價一度見135美元一桶。不過，中國成品油仲未同國際油價接軌。油價倒掛令煉油企業虧損加劇及令成品油供應一直處於緊張狀態。2006年中國進口原油一億四千五百萬噸，佔內地用油45％，2007年進口石油恐怕已佔內地用油超過一半，上述情況唔可以長存（東南亞國家已紛紛停止補貼成品油。但咁樣令短期CPI上升加劇）。中國唔可以長期依靠限制成品油而保持CPI處於相對較低水平；依家煉油廠每加工一噸原油虧損1000元人民幣，以135美元油價計，煉油廠虧損達1500億元人民幣，中央畀中石化（386）今年首季補貼74億美元，估計今年補貼全年係300億元人民幣，再加埋中海油補貼同減稅……。中國2008年對石油企業補貼約800億元人民幣，超過災後重建基金700億元人民幣。何況災後重建係一次性，如油價長期高企，補貼就係每年都需要。點解全國人民要補貼用油者（社會上較富有人士）？呢800億元補貼點解唔用興建廉租房、小學、中學學校或解決農村醫療問題。咁樣唔係較補貼用油者更合適咩？國家今年開支一律較預算減少5％用抗災，但用成品油補貼卻高達800億元人民幣，係咪有D荒謬？
五一黃金周國產品牌電視市場佔有率急跌，反而外資品牌急升至市場佔有率73％。彩電已成外資品牌天下；點解會咁？外資品牌係上流面板，生產商塊液晶面板大部分由外資企業工廠生產或入口，?家仲有盈利。佢地大熒幕液晶電視機平均降價25-30％，蝕本賣電視問題唔大，因為賣液晶平面板仲係賺錢；反而國產品牌佢地本身唔生產液晶平面板，所以賣電視機時唔可以蝕本。結果內地電視機零售市場漸漸落入外資品牌廠手上，因為佔整個電視機生產成本60-70％液晶平板生產技術仲外資電視企業手中，中國工廠只能做加工生產。
預測從唔可靠。你投資即表示願意自己資金承擔風險。因此，千萬不可冒你承擔唔起風險。連銀行都會投資錯誤，何況係一般人？
2007年8月起貝南奇透過注資及減息去減少次按危機殺傷力，搞到美元回落及全球性通脹。今年4月美國消費者稅後收入較2007年同期上升4.1％，但日用品平均售價反而上升10.4％，代表一般人生活水平將下降；情況就好似七十年代滯脹期。1979年年底雪茄伏出任聯儲局長就用高息對付通脹，搞到1981╱82年衰退先將通脹率馴服。今次又點？
超級泡沫爆破
滯脹期（Stagflationary Environment）耐性係好重要；商品價格此起彼落、食品價格及能源價格就係咁升；反而樓價同股價就唔升，雖然利率由5.25厘跌落2厘。個個都希望射中牛眼，結果就成日誤中副車。好似索羅斯所言：「我地正進入財富破壞期。例如中國正面對高通脹威脅，加埋出口增長率放緩，前景都幾令人擔心。」索羅斯認為，呢個次按危機係超級泡沫爆破，一個由列根總統時代已開始，超過二十五年日子泡沫已爆破。
熊市反彈從來唔易玩，尤其係聯儲局5月5日前已結束減息周期，利率由去年9月5.25厘減至今天2厘，CPI升幅卻係4％。為協助JP摩根大通收購貝爾斯登，聯儲局已接受290億美元唔易買賣資產，引發3月17日起反彈。但係由5月5日起，股市開始無定向，時好時壞。
新興國家股市正係重犯七十年代OECD國家相同錯誤。阿根廷通脹率已達23％、俄羅斯14％、沙地同印尼達9％（正在走向12％，如果印尼宣布取消汽油補貼）、中國達8.5％及智利8.3％。政府過去透過補貼或控制物價，阻止CPI上升，一如1972年尼克遜宣布凍結物價一樣；結果一取消後，物價就飛升。依家佔全球三分二人口新興國家人民正面對通脹率走向雙位數（例如中國食物價格上升22％、非食物價格上升1.8％，政府已宣布物價管制；印度則取消唔少商品期貨交易去打擊通脹上升，但長遠而計，咁樣做害多於利）。新興國家CPI升幅大過OECD國家，理由係食品佔CPI比重30-40％，OECD國家就唔夠15％。
香港由1990至97年情況係港元率偏低，以及香港政府唔俾港元升值，搞到本港通脹，樓價由2000元一呎升到12000元；薪金升三倍。1997年7月至2003年7月樓價跌65％，出現Boom & Bust。上述情況2003至07年中國發生，樓價狂升，自2008年起樓價出現調整。滬深A股由2007年10月17日5891.72，跌落2008年4月22日3122點，跌幅達47％，因政府宣布減印花稅而反彈；恒生指數由1997年8月7日16820點，跌落到1998年8月13日6544點，跌幅61.9％，亦因政府入市干預而回升。雖然恒生指數由1998年8月13日回升，但本港樓價卻一直跌到2003年第三季才止跌回升，相同情況會唔會內地出現？係一個好值得思考問題。
真正壓抑CPI方法係將利率推高至CPI增長率之上，咁樣做必引發短期衰退，令新興國家（包括中國）央行面對兩難局面。?家大部分新興國家仍處負利率期，貨幣供應增長率仍高達20％（俄羅斯更達42％），最終新興國家經濟會唔會出現1981╱82年美式衰退？以中國為例，如將利率推高至CPI增長率之上2厘，立即刺激人民幣價大幅升值，雖然可令CPI升幅受控制，但出口能力出現大倒退，令GDP增長率急跌至6％或以下而引發經濟衰退。如央行唔將利率推高，人民幣只會溫和上升，CPI升幅就解決唔到，最終因通脹問題而削弱中國貨出口競爭力，令GDP增長率回落，咁情況下，內地A股可見將來大方向係向下。