投資者日記 曹仁超 2008-4-23
救市第一炮？
4月22日，周二。恒生指數升217.48，收24939.15；成交877.4億元。期指高水，升380點，收24998點。中石油（857）升6.5％，見10.78元；中石化（386）升 5.1％，見7.85元，外傳政府將退回75％原油入口增值稅畀中石化及中石油。中國高速傳動（658）升10.49％，見14.12元，因純利上升二點六倍，至3.067億元人民幣。
內地傳政府力守滬指3000點 滬深三百指數升0.88％，收3296.28。內地傳政府有意阻止上證指數跌穿3000點而力守，令上證指數下午由 2990.79回升，收市倒升30.81，收3147.79。其中太平洋、國金證券、北京銀行漲停；南京銀行、寧波銀行、國元證券升超過7％。地產股如中華企業升超過9％、深振業A升8％，陸家嘴、金地集團、保利地產升幅亦不俗。江南證券認為上證指數3000點出現好淡爭持，與政府救市政策無關。世基投資認為大市成交萎縮，升市只係淡友平倉嘅結果。申銀萬國認為，股市缺乏方向感，個別股份出現抗跌力，引發投資者入市興趣。
花旗推介中移動（941），估計今年每股獲利5.773元人民幣，升34.9％，O二十一倍，目標價150元。世茂房地產（813）估計今年每股獲利87仙，減少31.7％，O十四倍，目標價為20元。
花旗亦推介細價股豐德麗（571），估計今年每股獲利18仙，減少64.3％，O十四點八倍，目標價3.65元。永恩國際（210）今年每股獲利29 仙，升24.7％，O十二點九倍，目標價5.8元。天津港（3382）今年每股獲利估計18仙，升32％，目標價4.5元。新宇亨得利（3389）估計今年每股獲利18仙，升29.2％，O十六點二倍，目標價4.1元。
美國負財富效應浮現
瑞銀推介安徽海螺（914），估計今年每股獲利2.39元人民幣，O二十一倍，估計股價可見66元。亦推介中國建材（3323），估計今年每股獲利 67仙，O二十點一倍，目標價26.4元。大摩則推介康師傅（322）、碧桂園（2007）及上海實業（363）。
去年8月開始英國商業銀行已唔願借貸畀同業，因英國樓價由去年8月起回落。
最近英倫銀行以500億英鎊政府債券交換三A級英國住宅按揭債券，對金融市場幫助有幾大？答案係令同業拆放利率略為回落。
金融界泰斗John Hussman管理嘅Hussman Strategic Growth Fund資產達31.8億美元。佢認為次按危機不但未過去，而且家吓仍處於初階，最多只完成四分一，仲有三、五年壽命，最快要2010年才完成。2002 到07年係美國個人實質消費擴張期（2007年只增加3.1％、2006年3.5％、2005年4.2％），2007年個人實質收入只升0.4％（2002年2.4％）。個人消費佔美國去年GDP 71.5％，財富效應轉為負數，加上工資、利息收入甚至股息、租金收入都冇大幅上升，未來消費力從何而來？根據房利美公司統計，2002至07年美國房價平均每季增加515億美元，令美國個人消費每年上升2.4％。上述情況2006年下半年結束，負財富效應2008年起浮現。
皇家蘇格蘭銀行宣布今年首季撥備59億英鎊，並集資120億英鎊，另拋售非核心項目，供股由高盛、美林及瑞銀包銷。去年該行動用100億英鎊收購荷蘭銀行後，發現資產價值迅速惡化，以市值計佢係英國第二大。呢次宣布十八股供十一股，每股200便士，較市價372.5便士低達46.3％；公布後股價下跌 3.9％。
高油價震盪去年開始
能源專家Chris Nelder認為，長達一百多年嘅廉價石油時代已過去，未來石油獲得成本十分昂貴（國際能源機構IEA估計未來二十五年要投資20萬億美元才能滿足能源需求）。冇廉價石油作為推動力量，二十一世紀經濟增長點樣維持？以中國為例，1990年只有五百五十萬部汽車，2006年達二千七百萬部，估計到2030年達三億部。1973年前美國成為汽車王國，係建基於每桶石油3美元；今天中國汽油成本卻係1973年前美國三十倍到五十倍。唔單止咁，全球石油產量未來二十多年能否再增加供應65％？世上冇事物係永恒嘅，過去美國經濟建基於廉價石油，其他國家面對120美元甚至200美元一桶石油，便不能照辦煮碗。來自高油價嘅震盪去年已開始。
今年首季標普五百指數跌9.4％，代表歐洲嘅FTS Eurofirst三百跌15.6％、日經平均指數跌17.5％、恒生指數跌17.4％、滬深A股跌34％；只有美國政府債券指數升4.49％、歐羅區政府債券升2.29％。世界股市由3月18日左右反彈，呢次反彈可維持幾耐？路透社旗下理柏公司估計，今年標普五百指數純利係負增長，甚至強如通用電氣首季純利亦急跌，其他可想而知。今年美國經濟已大幅放緩，世界經濟仍保持增長；未來係美國經濟拖慢全球GDP增長率抑或係全球經濟帶動美國GDP重新返回高增長？
我老曹擔心內地A股將重演1994至99年本港紅籌指數嘅走勢【下圖一、二】。紅籌指數1997年8月見頂後跌至1998年9月，滬深A股去年10月見頂後，會否一直下跌到今年第四季？上一次A股見頂係2001年，O六十五倍；見底係2005年中，O十二倍。2007年10月A股O接近七十倍，今天O仍高達三十倍。
索羅斯管理嘅170億美元量子對沖基金舊年表現出色，今年至今表現平平。拋空美元嘅利潤無法抵銷手持中國及印度股市嘅跌幅。索羅斯認為美國已接近衰退邊沿，聯儲局為對抗衰退而大幅減息，卻引發通脹。佢忽略高食物價格及高能源價格對中國同印度嘅打擊較美國同歐洲更大。
愈近奧運愈想救市
內地人認為，政府救市唔會無功而還，4月20日證監會只係打響救市第一炮，因為表示應救市嘅部委已愈來愈多，救市措施力度亦愈來愈大。內地人認為，同以前證監會採用基金救市唔同，依家主管金融嘅最高層對股市政策嘅態度，已由過去觀望改為救市佔主導。愈近奧運，希望股市止跌回升嘅呼聲愈高。
1995年7月越南國旗响文萊首都斯里巴加灣出現，代表越南加入東盟。有趣嘅係，東盟二十五年前成立，目的係阻止越南嘅共產主義向東南亞國家出口，今天卻歡迎越南加入。越南响2000年制訂2001至2010年嘅十年計劃，目的係建立一個現代化富東方色彩嘅工業國，包括物質、文化及精神生活。有人聯想起中國特色嘅社會主義市場經濟，但越南政府則話有所不同也！越南擁有豐富而廉價嘅人力資源，成為南中國一帶製造業外判嘅對象！越南政府致力令越南人收入較 2001年上升一倍，到2020年再升一倍（同鄧小平講嘅翻兩番相似），2006年越南更加入WTO。由於越南冇一孩政策，越戰結束後人口迅速膨脹，大部分集中响三個城市，即胡志明市、河內及海防。世界銀行估計，到2020年越南人口係依家嘅三倍。聯合國估計，2020年35％越南人口將集中响上述三個城市，甚至達到45％。羅兵咸永道估計，2005至2020年越南上述三大城市GDP增長率係全球最高，估計將保持2001年嘅速度，即12.2％一年。
里昂亞太區分公司估計，由1996年起越南迅速由國企轉向私人企業及外資企業，1996年私企及外資已佔全國企業50％、2000年60％、2004 年75％，國企消失嘅速度較中國快好多。依家國企只集中响河內及海防，胡志明市內嘅國企已接近唔存在，85％外國投資亦集中响胡志明市。政府計劃取消城市人與鄉村人之分（中國近年才開始），以吸引農村人口流入城市，加快工業化。
越南計劃到2010年有外國遊客六百萬（2004年三百萬）。不過，家吓全國五千九百間酒店只有十二萬四千個房間，而且平均一間酒店只有二十個房間，只有十九間五星級酒店（八間喺胡志明市、八間喺河內）。近期已吸引二百四十個外資項目，計劃投資60億美元响酒店方面，包括興建二萬一千個房間，其中八千間達四星級或五星級水準。
美國更計劃興建一個迪士尼式主題公園，位於離胡志明市三百公里嘅藩切，投資約10億美元，佔地六百公頃，內有五間度假式酒店（共九百個房間），一個十八個洞高爾夫球會所、六千個座位會議中心。不過，越南希望吸引嘅仍係工業方面投資。
越南能否成為東盟強國？
越南海岸線長達三千二百公里，有二百六十六個港口，其中一百四十四個係海港，只係設施落後。政府計劃未來五年投資45億美元响各港口設施；其中最大係西貢港口計劃投資16億美元，以便容納八萬噸級貨船停泊（依家只能停泊一萬噸級）。到2015年計劃發展十八個內陸機場及六個國際機場，投資72億美元。至於電力需求每年上升15％，越南已向鄰國買電（包括中國），計劃2010年前興建三十九間水力發電廠、七間天然氣發電廠及九間煤發電廠，到時42％來自水力發電、37％天然氣、20％煤。
根據IMF估計，依家47％流入越南嘅外資係投資製造業，但消費卻佔越南GDP 64％（大部分喺大城市）。越南人收入仍十分少，投資需求又咁大，能否响2020年成為東盟其中一個經濟強國，今天嘅中國、未來嘅越南？越南能否响十二年內追近中國經濟水平？
馬來西亞樓市仍可睇好
根據物業市場報告，2007年馬來西亞係2002年以來首次出現空置物業減少6.9％，由2006年二萬五千六百四十五個，減少至2007年二萬三千八百六十六個，其中61.7％係細單位，即價值低於15萬林吉特。去年新建成住宅上升36.7％，約五萬二千六百六十四個單位；交易增9％，至三十萬九千四百五十五個；價值上升25.2％，至771.4億林吉特。相信今年同明年馬來西亞房地產市場仍可睇好，由去年才開始嘅樓價上升至今仍十分健康。
本周一有九位內地房產公司主席包括SOHO中國（410）潘石屹、富力地產（2777）李思廉、萬通地產馮侖等已抵達台灣內湖科學園，參觀桃園慈湖與台中水滴經貿園。香港嘅諾林投資副總經理林世榮估計，一旦台灣對大陸開放投資，立即可售出一萬套以上豪宅。過去十五年唔少台灣人到長三角投資開廠（或到上海、昆山、蘇州科技園打工），吸納咗台灣二百五十萬人口，呢區家吓已有專為台灣人開設嘅醫院。蘇州人嘅笑話─—中台開戰，台灣只能派出386199步隊對付入嘅侵解放軍。何謂 386199部隊？（三八係婦女節、六一係兒童節、九九係重陽節即代表老人。）至於台灣男人？唔係去咗上海就係到蘇州或昆山，包大陸女人，唔返台灣打仗矣。