投資者日記 曹仁超 2008-4-08
中國人富起來要先有法治
4月7日，周一。恒生指數升314.13、收24578.76；成交994.69億元；期指升439點，收24659點。中移動（941）升4.6元，報128.4元；港交所（388）升3.8元，報152.3元；國壽（2628）升1元，報30.6元。呢次上升恒指能否超過2月4日高點25101點？
滬深三百指數升195.12或5.34％，收3845.82。江西銅及柳鋼漲停板。今天出現二個月來最大嘅漲幅。
美元止跌回升，兌日圓升1.2％，收102.65；兌歐羅見1.5692兌1歐羅；人民幣仍上升，成7.0018兌1美元。而估計日本4月9日維持利率不變，人民幣好快升穿7算。
BNP百利達認為，美股由1914年至今，熊市平均維持十五個月；最長都係四十一個月（1938年）、最短嘅四個月（1987年）。相信2007年10月開始嘅美股熊市到2009年2月先結束。
花旗認為，港股進入有吸引力嘅水平，建議分階段吸納；不過，上周機構投資者資金主要流向中國、新加坡及台灣；香港仍面對資金淨流出。
滙豐銀行分析部認為，熊市已由2007年10月開始，並認為係W底；3月18日已見第一個底並推介中移動（941）、交通銀行（3328）及新世界百貨（825）；唔排除反彈後又再回落，到出現第二個底先結束呢個熊市。近日回落由外資拋售引發，相信已差唔多並推介吸納中國股票。至於恒生指數，估計呢次反彈可見26000點。
摩根大通亦推介香港地產股，如新鴻基地產（016）及嘉華國際（173）等，認為近半年本港地產股表現落後地產，尤其係信和（083）同嘉華國際，短期內可追落後。估計2008年只有一萬零九百八十個住宅單位落成；2009年有一萬二千六百七十個，本港住宅單位一二年內仲係供不應求；除非政府更改土地政策，否則本港住宅樓短缺將長期化。
花旗推介中石化（386），估計2008年每股獲利78仙，升19.6％，O八點六倍，目標價14.32元。
各國干預難避免
今天《人民日報》發表關於政府救市嘅探討文章。不論係西方國家、香港抑或中國，真正嘅自由市場從來冇存在過，干預係無可避免。七十年代香港財爺夏鼎基美其名叫積極不干預。例如去年8月至今，美國聯儲局一連串行動亦係干預，至於何時應干預、何時唔使？則富爭議性。夏鼎基認為，當市場偏離正常軌道時，政府應進行干預。但何謂正常軌道又有排抝。
1994年7月30日中國證監會宣布三項救市措施：一、暫停新股發行及上市；二、嚴格控制上市公司配股規模；三、擴大入市資金範圍。出台後第一天股市指數上升33.2％，响三十三個交易天內由最低點325點升上1052點，上升204.13％，其後又回落一年多，响1996年1月19日見512點，跌幅近半。
第二次救市喺1999年5月19日，中國證監會召集全國證券商討論，其後推出改革股票發行體制、保險資金投入及解決證券公司合法融資渠道；6月10日央行更宣布減息；6月14日《人民日報》發表文章堅定信心及規範發展。中國股市指數由5月19日起，喺三十個交易天內上升64％，到2001年6月14日見最高點2245.44，其後出現四年熊市。
2002年6月23日係中國政府第三次救市，宣布暫停國有股減持，引發6月24日井噴，但第二天又回落，之後繼續漫長熊市，可以話呢次救市最失敗。
2004年2月2日係第四次嘅救市行動，出現國務院關於推進資本市場改革開放及穩定發展若干意見，簡指國九條。股市指數一直上升到4月7日，然後又再回落到2005年6月6日。
換言之，1994年至今中國政府曾出現四次救市事件，有些效果良好，有些只有一天反應；2008年4月救抑或唔救?!
理柏中國基金市場透視報告認為，內地A股大漲、大跌情況會反覆出現。面對全球性通脹及經濟減速大環境下，以及大小非流通及投資者行為單一新環境，中國股市情況化走勢仲會反覆出現。
2008年投資策略呢？一、今時今日才Take shelter係咪太遲？二、投資海外（包括中國）？分分鐘新興市場表現較香港差。2003年4月開始嘅股市日日好時光似乎喺2007年10月結束；之後面對嘅卻係風雨交加嘅晚上。信貸壓碎（credit crunch）最終會唔會令美國經濟陷入衰退或只係GDP低增長？連專家都爭抝緊，我地又點知？3月18日開始進入復原期，由於過去五個月所造成嘅傷害幾嚴重，亦非短期內可以好番。4月中花旗、美林及美國銀行三大金融業巨無霸公布2008年第一季業績，到時撥備幾多？華爾街事前估計係咪足夠？我老曹傾向同意格老睇法（即美國經濟未進入衰退期，未來進入衰退期機會已超過50％）。聯儲局能否短期內恢復信貸市場信心？今天要美國人增加消費必須刺激佢地借貸；响失業率向上及樓價向下環境下，有邊個願增加借貸？
台灣
3月17日貝爾斯登响摩根大通收購下先避免破產，雖然喺咁，道指首季仍回落7.6％、標普五百指數回落9.9％、納指回落14.4％。美國股票基金平均回落10.1％、全球股票基金平均回落 9.6％、中國股票基金平均回落21.2％（Lipper數據）、只有黃金基金今年首季仍升5.2％。問題係商品價格繼續爆炸性上升，抑或進入參差頂？
1980年香港工業內移；1984年內部消費行業重新帶動香港GDP上升。反觀台灣，1992年製造業移去長三角，十五年過咗啦，台灣內部消費行業卻未能興旺起來。上述情況會否因馬英九上台而改變?!香港廠商將製造業內移，但寫字樓仍留喺香港，响內地賺咗錢則回港買豪宅兼消費；內地企業亦來港上市，賺咗錢亦响香港買豪宅兼消費，例如體操天王李寧一度係我老曹嘅街坊……楊超更係同屋住。反觀台商卻搬去上海，喺上海買豪宅（或到加拿大及澳洲買豪宅）而唔係番台北市，連消費亦唔番台灣。點樣吸引中國境內二百萬台灣人番台北買豪宅兼消費？
單靠台灣牛肉麵兼貢丸係唔得嘅。香港零售業已集全球名牌喺香港（法國時裝喺香港買較巴黎平、意大利手袋响香港亦較米蘭平……）；香港更成為美食天堂（牛排已達美國水平、甜品較意大利毫不遜色、日本刺身媲美東京、法國菜亦同巴黎睇齊）。至於台灣仍停留喺街邊小食時代。乜嘢棺材板、煎蠔仔餅及燒魷魚……。坦白講唔好搞我，自己已一把年紀，點敢再食呢類街頭小食？唔怕膽固醇偏高咩。至於台灣小籠包水平唔及上海嗰邊美味；日本刺身雖較香港平但水準唔及香港。唯一欣賞係台北市交通網絡搞得幾好，例如巴士接駁地鐵方面較香港好，的士司機服務態度亦幾好（雖然東京的士司機服務態度更好，但日本的士收費太貴）。
內地房產潛力大
2008年第一季係內地股民嘅悲慘世界，無論你買乜嘢都逃唔出一跌命運！高手也好，低手也好，2008年首季大部分基金都係負增長！人們一直崇尚嘅價值投資法或長線投資理論，都被市場徹底顛覆同無情嘲弄。近期連投資房產亦面對拐點。投資黃金，金價亦一下子跌落嚟；投資古董字畫？自己又冇呢個水平；投資債券基金，收益又如雞肋。2008年我哋仲可以投資乜？真係一個大問題。
長遠睇，中國人均收入有一天同香港人睇齊，即係達23000美元一年，到時內地大城市樓價相信亦同香港睇齊。但2007年中國人均收入只有2300美元，幾時才見23000美元？十年、二十年、三十年或者要五十年。從長遠睇，中國房地產潛力好大，前途很好；但短期睇，房價與收入不成比例，短期漲得太快，一旦出現調整便套住咗。日本人叫房產係不動產，即冇法流動。因此，港人收入可以支持今日香港樓價，但內地各城市人收入能否支持各城市樓價，又係另一回事。
去年進軍中國資本市場嘅海外基金亦賠本。例如國際私募基金CVC收購珠海中富29％，收購價8.27元一股，4月3日收市價7.59元。16.5億元投資已虧損超過2億元；瑞士豪西蒙集團嘅華新水泥投資，賬面蝕咗6億元；黑石集團去年9月11日以6億美元（45億元人民幣），入股藍星集團20％，該公司佔三家上市公司即星新材料54.27％、藍星清洗 27.08％，以及瀋陽化工33.66％。至今年4月3日止，藍星集團响三家上市公司市值冇咗80億元人民幣，令黑石集團去年9月投資响藍星集團市值唔見咗16億元。瑞士豪西蒙集團（Holim Ltd.）今年2月以每股26.95元買入華新水泥七千五百二十萬股，收購價20億元，二個月唔夠，華新水泥股價已跌至18.6元人民幣，二個月唔夠，豪西蒙集團賬面冇咗30％或6億元人民幣。
資本市場上冇永遠嘅贏家，去年中國資金出征海外，抑或外國資金湧入中國，結果都係一樣──蝕本。
中國人一向主張勤和儉，事實上，大部分中國人都勤和儉，點解世上最富有國家唔係中國？有人認為，係列強瓜分咗中國財富。中華人民共和國1949年成立後又點？有人認為，係共產制度阻礙經濟發展。1978年改革開放後，中國GDP以每年平均9％速度上升，但我地不妨睇吓東南亞國家、拉丁美洲國家甚至印度，佢地人民何嘗唔係勤和儉？點解無法富起來？反而香港人卻可以富起來？
根據美國耶魯大學教授陳志武研究：分別喺產權與合約權益保護機制。簡單點講就係法治。只靠勤和儉只能支持市場經濟發展到一定程度，卻冇法讓一個國家或地區經濟充分地深化，以及讓經濟實現最大化。五十年代至七十年代香港經濟發展便有賴市民嘅勤和儉；情況同東南亞國家一樣；但八十年代香港經濟繁榮有賴產權與合約權益保護機制（簡稱法治）。當產權與合約權益獲充分保護，可令交易成本迅速下降，市場便可以進行自由選擇，以最平嘅成本完成交易，令積蓄透過市場機制流向股票市場及房地產，進一步創造更大財富；反之，政府權力如不受制衡，司法無法獨立，私人產權與合約權益隨時面對行政權力所侵犯。市民對自己所擁有嘅產權唔放心，便會產生財產轉移到別國或減少投資現象。形成國家或社會一旦達到小康局面後，經濟又再停滯不前。
中國人嘅勤和儉過去三十年，已令中國經濟步入小康；未來三十年中國人均收入能否同港人睇齊？再唔係勤和儉因素，而係產權與合約權益保護機制能否獲充分尊重。呢方面好多東南亞國家、拉丁美洲國家甚至印度都做唔到，未來中國可以咩？勤和儉有如打工仔賺錢，收入永遠無法大幅上升。反而產權喺合約權益獲充分保護下，企業才獲迅速發展，市民透過投資可以富起來。例如恒生指數由1970年100點升到今天24000點，上升二百四十倍，創造咗幾多財富？
以取得營業執照到開業為例，喺香港只要二天（今天到政府部門辦手續，明天開業）；美國要七天；中國要一百一十一天（唔包括星期六及日，如包括大約需半年）。中國勞動成本雖然平，但交易成本卻十分昂貴；因此，做生意中國仍不及香港方便。
香港同新加坡為何人均收入咁高？答案係：一、交易成本便宜。因港人及新加坡人嘅產權及合約權益獲政府充分保障（例如政府不能強佔民居，人民可告政府。由於司法獨立，政府隨時打輸官司。所以港人從不擔心自己產權被政府侵蝕）。政府不與民爭利，只擔任裁判人角色；二、政府唔影響司法獨立權；三、公務員廉潔同高效率。中國能否繼勤和儉之後建立法治社會？決定滬深A股後市點睇。
大行報告仍有價值
通脹率急升令東歐由投資帶動嘅經濟，可能面對硬着陸；上述係IMF警告。去年外資向十個新歐盟成員國（東歐）直接投資393億歐羅，較2000年245億歐羅多出60％。但 2001年至今唔少東歐國家工資上升140％，雖然升幅咁大，但工人仍流向西歐國家找工作；因為東歐平均工資每月只有908美元，而西歐卻有4575美元一個月，形成當地勞工不足。估計2008年直接投資東歐資金將大減。
美國股票經紀行Schwab問：2007年第三季華爾街一千八百位分析員高估上市企業純利8.2％；第四季更高估33.5％。咁嘅水平邊度需要分析員？近年大行分析報告水平每況愈下係不爭事實。但我老曹認為仍有一定參考價值。佢地對企業純利估計，通常視乎股市水平而打折，例如去年10月股市興旺期，我老曹將佢地嘅純利估計打個七折；今年3月本人將他們純利估計打個九折。不如意事十常八九；投資成功唔係眼光獨到而係策略運用。十項投資中八、九項係虧損都唔怕，因早已止蝕離場；雖然只有一、二單命中牛眼，但因為賺100％回報。即只要命中一單已可抵銷九單虧損；如命中二單便十分和味。